पोखरा । अमेरिकी सहायता परियोजना (एमसीसी) लाई संसदमा टेबुल गर्ने भनिएको दिन आज यस सम्झौतालाई राष्ट्रघाती भन्दै ६ विभिन्न राजनीतिक दल तथा मोर्चाले गरेको नेपाल बन्दको प्रभाव पोखरामा पनि परेको छ ।

पोखरामा सार्वजनिक यातायातका साधनहरू चलेका छैनन् । निजी सवारी मात्र कमैले चलाएका छन् । पोखराका मूख्य बजार क्षेत्र सुनसान जस्तै छ । भित्री सडक खण्डका केही पसलहरू खुलेका छन् । मूख्य मूख्य चोकहरूमा सुरक्षाकर्मी तैनाथ गरिएको छ ।

पोखरासहित कास्कीका एक दुई स्थानमा बिहानै बन्दकर्ताले टायर बालेर विरोध जनाएको भए पनि तत्कालै प्रतिवाद गरी निस्तेज पारिएको कास्की प्रहरीले जनाएको छ । प्रहरीले कास्कीको अवस्था सामान्य रहेको बताएको छ ।

मोहन वैद्य नेतृत्वको नेकपा (क्रान्तिकारी माओवादी), नेत्रविक्रम चन्द (विप्लव) नेतृत्वको नेपाल कम्युनिस्ट पार्टी, ऋषि कट्टेल नेतृत्वको नेकपा, आहुती नेतृत्वको वैज्ञानिक समाजवादी पार्टी र कर्णजित बुढाथोकी नेतृत्वको नेकपा माओवादी केन्द्र समाजवादी तथा सीपी गजुरेल नेतृत्वको देशभक्त गणतान्त्रिक मोर्चा नेपालले देशव्यापी बन्द आह्वान गरेका हुन् ।

गण्डकी प्रदेश स्थापना दिवसका अवसरमा प्रदेश सरकारले आज सार्वजनिक बिदा समेत दिएका कारण पनि सरकारी कार्यालय, विद्यालयहरु खुलेका छैनन् ।