पोखरा । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले सर्वोच्च अदालतप्रति आक्रामक अभिव्यक्ति दिएका छन्।

आज शुक्रबार पोखरामा आयोजित एमालेनिकट पत्रकारको संगठन प्रेस चौतारी नेपालको नवौं राष्ट्रिय महाधिवेशन उद्घाटन समारोहमा सम्बोधन गर्दै उनले गत असार २८ को फैसलासँग जोडेर अभिव्यक्ति दिएका हुन्।

उनले पत्रकारहरुलाई जनादेशको समर्थन गर्ने कि परमादेशको समर्थन गर्ने? भन्ने प्रश्न उठाउँदै अहिले सर्वोच्च अदालतको परमादेशबाट गोरुले अहिलेको सत्ता गठबन्धन नामक पाँचवटा बाच्छा पाएको टिप्पणी गरे ।

उनले सेटिङमा सब काम भइरहेको बताए। ओलीले भने– ‘तपाई परमादेशको समर्थन गर्ने कि जनादेशको? सबैलाई खुसी पार्न सकिँदैन । परमादेशका नाममा जनादेशको माखौल उडाइएको छ । सेटिङमा सबै काम भइरहेको छ । एकजना न्यायाधीशले अमेरिकाबाट इमले लेख्छन्– केपी ओलीको सरकार नढाली भएको थिएन, त्यसैले संविधान बाहिर गएर फैसला लेख्नुपरेको हो । ती न्यायाधीशको के बिगार्देको थियो, त्यो सरकारले? खासमा त्यो इमेलले वर्गीय दुराग्रह झल्काउँछ ।’

संविधान बाहिर गएर आफू नेतृत्वको सरकार ढालेको आरोप लगाउँदै उनले अदालतले सरकार बनाउने बताए । उनले भने, ‘सरकार बनाउने संसद र जनप्रतिनिधिको काम हो । अदालतको होइन । तर, नेपालमा, एकपल्ट एकजनाले भनेका थिए, गोरु ब्याउँदैन भन्थे, सर्वाेच्च अदालतमा गोरु ब्यायो । अहिले गोरु ब्यायो मात्र होइन, पाँचवटा बाच्छा पायो ।’