पोखरामा बालिकाको मुन्द्रा चोरीमा संग्लग्न भएको आरोपमा प्रहरीले एक युवतीसहित तीन जनालाई पक्राउ गरेको छ।

गत चैत्र १ गते पोखरा महानगरपालिका -१ टुंडिखेलस्थित राष्ट्रिय माविमा अध्ययनरत दुई जना बालिकाको सुनको मुन्द्रा चोरेको भन्ने सूचनाका आधारमा वडा प्रहरी कार्यालय बगरबाट खटिएको प्रहरीको टोलीले ३ दिनपछि युवतीसहित चोरीमा संग्लग्न रहेको आरोपमा तीनजना लाई पक्राउ गरेको हो।

पक्राउ पर्नेमा स्याङ्गजा जिल्ला स्थायी घर भइ हाल पोखरा -१५ घलेचोक नयाँगाउ मार्ग बस्दै आएकी अम्बिका पुलामी मगर पोखरा – २३ स्थायी घर भई हाल पोखरा -१७ राष्ट्र बैंक चोक बस्ने वर्ष ६४ का थमन सिंह विश्वकर्मा र पोखरा – २१ निर्मल पोखरी घर भई हाल पोखरा -१ भैरवटोल बस्ने वर्ष २७ का निशान विश्वकर्मा रहेका छन् । थमन सिंह र नितेश विश्वकर्मा सुन पसलका संचालक हुन्।

प्रहरीले उनीहरुको साथबाट ७.६ लाल रहेको सुन जस्तो देखिने पहेँलो धातुले बनेको स-साना मुन्द्राका टुक्राहरू वरामद गरेको छ। अम्बिका पुलामी यस अगाडि पनि सोही प्रकृतिको अपराधमा संग्लग्न भएकोमा कास्की जिल्ला अदालतबाट गत पौष ५ गते एक लाख धरौटी तिरेर छुटेको प्रहरीले जनाएको छ।

हाल उनीहरुमाथि चोरी तथा डाँका कसुरमा जिल्ला अदालत कास्कीबाट ६ दिनको म्याद थप गरी अनुसन्धान प्रक्रिया अगाडि बढाइएको कास्कीका प्रहरी नायव उपरीक्षक तथा प्रहरी प्रवक्ता सुन्दर तिवारीले जानकारी दिए।