पोखरामा बुधबार बिहान ट्रकले स्कुटरलाई ठक्कर दिँदा एक छात्राको मृत्यु भएको छ । पोखराको सभागृहचोकमा ना ६ ख ४७२५ नं. को दश चक्के मालवाहक ट्रकले ग १४ प ६५९८ नं. को स्कुटरलाई ठक्कर दिँदा स्कुटर चालक विद्यार्थीको मृत्यु भएको प्रहरीले जनाएको छ ।

बिहान करिब ६ बजेको समयमा भएको दुर्घटनामा पोखरा १५, नयाँ गाउँकी १८ वर्षीया अञ्जना पाइजाको मृत्यु भएको कास्की प्रहरी प्रवक्ता, डिएसपी सुन्दर तिवारीले जानकारी दिए ।

दुर्घटनामा गम्भीर घाइते भएकी अञ्जनालाई गण्डकी मेडिकल कलेजमा लगिएकोमा उपचारको क्रममा मृत्यु भएको हो । बाटो काट्दै गर्दा ट्रकले ठक्कर दिएपछि मृतक अञ्जनाको शरीर चक्कामुनि परेको प्रत्यक्षदर्शीले जनाएका छन् ।

स्कुटरको पछाडि सवार पाेखरा १०, घलेचोक निवासी १८ वर्षीया मीना गुरुङ घाइते भएको डिएसपी तिवारीले जनाए । घाइते गुरुङको अवस्था सामान्य छ । उनकाे ढाँडमा चाेट लागेकाे छ ।

मृतक पोखराको बगालेटोलस्थित हिमाल म्यानेजमेन्ट कलेजको कक्षा ११ मा अध्ययनरत रहेकाे बताइएकाे छ ।

ट्रक चालक विश्व श्रेष्ठ र सहचालकलाई नियन्त्रणमा लिएर अनुसन्धान भइरहेको प्रहरीले जनाएको छ । चालक श्रेष्ठ तनहुँ जिल्ला व्यास नगरपालिका ११ का हुन्।