पोखरा । अखिल नेपाल फुटबल संघ (एन्फा) कास्कीको आयोजनामा पोखरा रंगशालामा जारी सावित्री निर्माण सेवा कास्की लिगको उपाधिका लागि शितल ज्योती युवा क्लब र हेम्जा युनाइटेड क्लब भिड्ने भएको छ ।

खेल संयोजक नर प्रसाद गुरुङका अनुसार रंगशालामा बुधबार भएको पहिलो खेलमा भ्याली स्पोर्ट्स क्लबलाई ४–३ गोल अन्तरले पराजित गर्दै शितलज्योती फाईनलमा प्रवेश गरेको हो ।

शितलज्योतीको जितमा खेलको २९ औं मिनेटमा प्रतिक गुरुङले गोल गरे । त्यसैगरी ३५ औं मिनेटमा अविशेष थापाले दोस्रो गोल गरे । खेलको ५९ औं मिनेटमा सहिल गुरुङले तेस्रो गोल थपे भने दोस्रो हाफको ६५ औं मिनेटमा सरोज विकले निर्णायक गोल गरे ।

यता हार व्यहोरेको भ्यालीको तर्फबाट विजय गुरुङ, अजय श्रेष्ठ र सिद्धान्त गुरुङले समान १ गोल फर्काएका थिए ।

त्यसैगरी हेम्जा युनाईटेडले विष्णुपादुकालाई २–१ गोल अन्तरले हराएको संयोजक गुरुङले जानकारी दिए । उनका अनुसार हेम्जा युनाईटेडको जितमा खेलको पहिलो मिनेटमै विशाल विकले गोल गर्दै अग्रता दिलाए । तर खेलको ३९ औं मिनेटमा विष्णु पादुकाको तर्फबाट राजन थापाले १ गोल गर्दै खेल बराबरीमा फर्काए र निकै प्रतिस्पर्धात्मक भएको खेलमा ६० औं मिनेटमा हेम्जा युनाईटेडका कृष्ण खड्काले निर्णायक गोल गर्दै टिमलाई जिताए ।

अब आज बिहीबार फाईनल खेल शितलज्योती युवा क्लबसँग मध्यान्ह १२ बजे प्रतिस्पर्धा गर्ने संयोजक गुरुङले बताए ।

लिग विजेताले दोस्रो संस्करणको गण्डकी प्रदेश स्तरीय मुख्यमन्त्री कप फुटबल प्रतियोगितामा सिधै भाग लिन पाउने गुरुङले जानकारी दिए ।

उनका अनुसार लिग विजेता टोलीले ७५ हजार र उपविजेता टोलीले ५० हजार प्राप्त गर्ने एन्फा कास्कीले जनाएको छ ।