नेकपा एमालेका अध्यक्ष केपी शर्मा ओलीले आफूले चाहे पाँच दलीय गठबन्धन एक हप्तामै ढल्ने दाबी गरेका छन् । आइतबार च्यासलस्थित पार्टी कार्यालयमा आयोजित पत्रकार सम्मेलनमा अध्यक्ष ओलीले भने, ‘हामीले चाह्यौं भने यो गठबन्धन एक हप्तामा ढल्छ ।’

अध्यक्ष ओलीले गठबन्धनलाई ‘आपराधिक गठबन्धन’को पनि संज्ञा दिए । ‘गठबन्धनका नेताहरूले जनतालाई डर, धम्की दिइरहेका छन् ।

‘हामीलाई भोट नदिए चाखौँला, पखौँला भन्दैछन्,’ उनले भने, ‘जनतालाई धम्काउनु आचारसंहिता विपरीत हो । प्रचण्डले मेरी छोरीलाई जिताइएन भने देशमा महासंकट उत्पन्न हुन्छ, देशमा दुर्घटना हुन्छ भन्छन् । त्यसैले यो गठबन्धन आपराधिक हो ।’

अध्यक्ष ओलीले माओवादी केन्द्रलाई बिरालोको संज्ञा पनि दिए । ‘बिरालो किन्नु पर्दैन, तपाईंहरूलाई थाहा छ नि । जसले ठूलो कचौरामा दूधभात दिन्छ, त्यसकोमा जान्छ,’ ओलीले भने, ‘हाम्रो क्रयशक्ति कांग्रेसको भन्दा बढी छ, बिरालोको हकमा ।’