पोखरा। लुकिछिपी भिडियो बनाई ठूलो रकमको माग गर्दै चरित्र हत्याको धम्की दिने एक जनालाई कास्की प्रहरीले पक्राउ गरेको छ।

पोखराका एक मानिसको लुकिछिपी भिडियो बनाएर पचास लाख रुपैयाँको माग गर्ने अन्यथा सामाजिक संजालमा पोष्ट गरिदिन्छु भन्दै धाक धम्की दिने एक जनालाई कास्की प्रहरीले पक्राउ गरेको हो। पक्राउ पर्नेमा बाजुरा जिल्ला बडी मालिका नगरपालिका वडा नं -७ बस्ने २७ वर्षीय शान्तराज तिमिल्सिना रहेका छन्।

कास्कीका निमित्त प्रहरी प्रवक्ता ज्ञानबहादुर खड्काका अनुसार तिमिल्सिनाले चरित्र हत्याको धम्की दिन थालेपछि पीडित मानिसले उनलाई तीन लाख रुपैयाँ दिएका थिए। तर, रकम मागको शृंखला नरोकिएपछि पीडितले तिमिल्सिना विरुद्ध जाहेरी दिएका थिए।

पीडितको जाहेरीको आधारमा अनुसन्धानमा खटिएको कास्की प्रहरीले तिमिल्सिनालाई जिल्ला प्रहरी कार्यालय कैलालीको समन्वयमा पक्राउ गरी पोखरा ल्याएको हो।

उनीविरुद्ध अपराधिक विश्वासघात सम्बन्धी कसुरमा जिल्ला अदालत कास्कीबाट ७ दिन म्याद थपको अनुमति लिएर आवश्यक अनुसन्धान शुरु गरिएको निमित्त प्रहरी प्रवक्ता खड्काले जानकारी दिए।