पोखरा । विभागीय टिम एपीएफ र नेपाल पुलिस क्लव नवौं राष्ट्रिय खेलकुद प्रतियोगिता अन्तरगत महिला भलिबलको फाइनलमा प्रवेश गरेका छन् ।

म्याग्दीको बेनी स्थित खुल्ला मञ्च खेलमैदानमा मंगलबार भएको सेमिफाइनलमा एपीएफले बागमती र पुलिसले गण्डकी प्रदेशलाई पछि पार्दै फाइनलमा पुगेका हुन् ।

एपीएफले बागमतीलाई १ का विरुद्ध तीन र पुलिसले गण्डकीलाई सोझो तीन सेटमा पराजित गरेको हो । पहिलो सेट २५–२३ ले जितेको बागमतीलाई एपीएफले त्यसपछिका तीन सेट क्रमश : २५–२३, २५–२२ र २५–१६ को अन्तरमा पराजित गर्‍यो ।

एपीएफको कप्तानी निरुता ठगुल्ना र बागमतिको टिमको नेतृत्व ललिता नाथले गरेकी थिइन् । कमला पुनले नेतृत्व गरेको पुलिसले अरुणा शाहीको कप्तानीमा रहेको गण्डकीलाई २५–१०, २५–१८ र २५–११ अंकमा पराजित ग¥यो । कमला र अरुणा दुवै म्याग्दीका हुन् ।

तेस्रो स्थानका लागि बुधबार बिहान १० बजे बागमती र गण्डकीबीच प्रतिस्पर्धा हुने जिल्ला खेलकुद विकास समितिका अध्यक्ष दिनेश केसीले जानकारी दिनुभयो । यसैगरी एपीएफ र पुलिसबीच दिउँसो १ बजे अन्तिम फाइनल खेल हुनेछ।

असोज २७ गतेदेखि शुरु भएको प्रतियोगितामा सात प्रदेश र तीन विभागीय टोली सहभागी थिए । कर्णाली र मधेश प्रदेश पहिलो चरणबाट बाहिरिएका थिए । विभागीय टिम नेपाली सेनाको त्रिभुवन आर्मी, लुम्बिनी, प्रदेश १ र सुदुरपश्चिम प्रदेश क्वाटर फाइनलबाट बाहिरिएका थिए ।