पोखरा । राष्ट्रिय प्रजातन्त्र पार्टीको तर्फबाट गण्डकी प्रदेश समानुपातिक उम्मेदवार सुनीता केसी यतिबेला पार्टीको पक्षमा मत माग्दै जनताको घरदैलोमा छिन् । सहिद क्षेत्रबहादुर केसी पत्नी सुनीता घरदैलोमा गईरहँदा मतदाताहरुले उनको श्रीमानको योगदानको सम्झना अहिलेसम्म पनि गरेका छन् । क्षेत्रबहादुर केसीले पोखरासँगै हालको वडा नम्बर १४ मा पुर्याएको योगदान अतुलनीय भएको मतदाताहरुले बताएका छन् ।

मतदाताको घरदैलोमा पुग्दा मेरा दिवंगत श्रीमानप्रति जनताहरुले देखाएको माया देखेर म आफैँ अचम्मित भएकी छु । सुनीताले भनिन् यस्तो खालको सम्मान राजनीति गर्ने व्यक्तिले मात्र पाउँछन् भन्ने कुरा मैले थाहा पाएँ । श्रीमान् दिवंगत भएको २ दशक पुग्न लाग्दा समेत जनताले उनलाई दिएको सम्मान देखेर आफूलाई राजनीतिमा लाग्न अझै बढि प्रेरणा मिलेको सुनीताले बताईन् । जनताले समस्या बुझ्ने र काम गरेर देखाउने जनप्रतिनिधि खोजेको बताउँदै उनी आफू पनि श्रीमानकै बाँकी सपना पूरा गर्नका लागि राजनीतिमा होमिएको बताईन् ।

मेरो श्रीमानले समाजमा जे काम गर्नुभयो सबै जनताको हितमा गर्नुभयो । त्यसैले त मानिसहरु अहिलेसम्म पनि उहाँलाई बिर्सन सकिरहेका छैनन् । सुनीताले भनिन् म उहाँकै पदचाप पछ्याउँदै राजनीतिमा होमिएकी हुँ । अबको मेरो राजनीतिक जीवन पनि पूर्ण रुपमा समाजकै लागि हुनेछ । केसी परिवारप्रति जनताले गरेको विश्वासलाई आफूले कहिल्यै पनि मर्न नदिने सुनीताले वचन दिईन् ।

स्वर्गीय क्षेत्रबहादुर केसी राप्रपाका केन्द्रीय उपाध्यक्ष समेत बनेका थिए । पोखरा नगर विकास समितिको अध्यक्ष समेत भएर काम गरेका केसी तत्कालिन वडा नम्बर १४ को अध्यक्ष भैसकेका व्यक्ति हुन् । केसीलाई द्वन्दकालमा तत्कालिन माओबादीहरुले गोली हानी हत्या गरेका थिए ।

यतिबेला सुनीता पोखरा र लेखनाथ लगाएका क्षेत्रका मतदाताहरुसँग भेटघाट गरिरहेकी छन् । राष्ट्रिय प्रजातन्त्र पार्टीको तर्फबाट समानुपातिक प्रदेश उम्मेदवार बनेकी सुनीताले पार्टीप्रति पनि आफू जिम्मेवार भएर विकास र सम्बृद्धिको काममा लाग्ने प्रतिबद्धता जनाईन् ।