Gandak News
Our News Your Views

अब मेराे राजनीतिक पहिचान विरासतकाे मात्र हाेइन: विद्या भट्टराई

कास्की क्षेत्र नं. २ बाट प्रतिनिधिसभा सदस्यमा लगातार दोस्रो पटक एमाले नेतृ विद्या भट्टराई निर्वाचित भएकी छन् । भट्टराईका श्रीमान् तत्कालीन पर्यटनमन्त्री रवीन्द्र अधिकारीको २०७५ साल फागुनमा हेलिकोप्टर दुर्घटनामा निधन भएको थियो । त्यसपछि २०७६ सालमा कास्की–२ मा भएको उपनिर्वाचन जितेर विद्या पहिलोपटक संसद पुगेकी थिइन् ।

विद्यालाई अहिले पनि रवीन्द्रकै विरासतमा राजनीतिमा स्थापित भएकाे भन्नेहरू भेटिन्छन् । विद्यार्थी राजनीति हुँदै प्राज्ञिक क्षेत्रमा पनि उत्तिकै सक्रिय नेतृ भट्टराईले भने आफ्नो राजनीतिलाई पारिवारिक विरासतसँग मात्र जोडेर नहेर्न आग्रह गरेकी छन् ।

पोखरामा बुधबार आयोजित पत्रकार सम्मेलनमा एमाले नेतृ भट्टराईले आफू पारिवारिक जीवनबाट सामाजिक र राजनीतिक जीवनमा आइसकेकाले विरासतभन्दा पनि आफ्नो क्षमता हेरिनुपर्ने बताइन् ।

‘रवीन्द्रको विरासत एउटा परिचय हो । म त्यसलाई अस्वीकार गर्दिनँ । मलाई राजनीतिकर्मी, संसदको एउटा सदस्य मान्ने हो । जनताले विद्या भट्टराईलाई म्यान्डेट दिनुभएको छ,’ उनले भनिन्, ‘पारिवारिक विरासतको मेरो परिचय म गर्व गरेर स्वीकार गर्छु । तर, राजनीतिक हिसाबले मेरो पहिचान त्यो मात्रै होइन । राजनीतिमै साढे ३ दशक रहेकाे हिसाबले मेराे छुट्टै परिचय पनि छ । ’

रवीन्द्रको निधनपछि विद्या राजनीतिमा आएकी होइनन् । उनी विद्यार्थीकालदेखि नै सक्रिय थिइन् । तत्कालीन एमालेको विद्यार्थी आन्दोलनमा सक्रिय विद्या अनेरास्ववियुको सचिवसम्म भइसकेकी थिइन् । विद्या सचिव हुँदा रवीन्द्र महासचिव थिए । रवीन्द्रसँग विवाह गरेपछि भने विद्या सक्रिय राजनीतिबाट टाढिएकी थिइन् । प्राध्यापनमा क्रियाशील विद्याले रवीन्द्रको निधनपछि उपनिर्वाचनमार्फत सक्रिय राजनीतिमा पुनरागमन गरेकी हुन् ।

आफूले जनताको पक्षमा गरेको काम हेरेर पहिलो परिचय दिइनुपर्ने नेतृ भट्टराईले बताइन् । अकल्पनीय घटनाले संसदमा आइपुगे पनि राजनीतिमा भने नयाँ नभएको उनको भनाइ थियो । ‘मेरो जीवनसाथी गुमाइरहँदाको पीडासँगै संसदीय राजनीतिमा म आउने कुरा एउटा पक्ष रहन्छ । अबको मेरो पहिचान त्यो पहिलो बन्दैन भन्ने लाग्छ,’ भट्टराईले भनिन्, ‘मेरो पहिलो परिचय भनेको मेरो काम, मेरो व्यवहार र जनताको विश्वासलाई आँच पुर्‍याउने काम नगरेको आधारमा गरिनुपर्छ भन्ने ठान्छु ।’ संसदमा आफ्नो क्षमताले भ्याएसम्म सशक्त भूमिका निर्वाह गर्ने भट्टराईको प्रतिबद्धता छ ।

लोड हुँदै ...