पोखरा । पोखरा महानगरपालिका वडा नं. २७ को आयोजना तथा किंग्स इन्टरनेशनल कलेज प्रालि, तिलोत्तमा नगरपालिका वडा नं. २, रुपन्देहीको समन्वयमा सञ्चालित दुई दिने नेतृत्व विकास तालिमको बुधबार समापन गरिएको छ ।

वडा कार्यालयको महिला विकास कार्यक्रम अन्तर्गत मंगलबारदेखि सुरु भएको तालिम वडाका तीन ठाउँमा सञ्चालन भएका थिए । वडा नं. २७ को अर्घौंचोक, तालचोक र रिठ्ठेपानीमा सञ्चालित तालिममा प्रशिक्षकहरू फेवा टेलिभिजनका कार्यक्रम प्रमुख रूद्रबहादुर श्रीस, नेपाल पत्रकार महासंघ, कास्कीकी उपाध्यक्ष जमुना वर्षा शर्मा र रेडियो जननीकी स्टेशन म्यानेजर रत्ना गुरुङले सहजीकरण गरेका थिए ।

तालिमको समापन गर्दै वडाध्यक्ष पूर्णकुमार गुरुङले वडाका महिलाहरूको क्षमता अभिवृद्धि र नेतृत्व विकासका लागि तालिमको आयोजना गरिएको बताए । तालिममा सिकेका कुरालाई व्यवहारमा उतार्न प्रशिक्षार्थीहरूलाई आग्रह गर्दै वडाध्यक्ष गुरुङले अरुका सामु आफ्ना कुरा राख्न सक्ने गरी महिलाहरू सक्षम बन्नुपर्ने धारणा राखे ।

वडा सदस्य बुद्धिमाया थापामगरले तालिमबाट सिकेका कुरालाई आत्मसात गर्न सके महिलाहरूले पनि नेतृत्व लिएर अघि बढ्न सक्ने बताए । देशको उच्च ओहोदासम्म महिलाहरू पुगेको र नेतृत्व श्रृंखलाको विकासका लागि महिलाहरूले आफ्नो क्षमता विकास गर्नुपर्नेमा वडा सदस्य थापामगरले जोड दिए । त्यस्तै, वडा सदस्य लक्ष्मी विकले महिलाको क्षमता विकास गर्न आगामी दिनमा पनि यस्ता तालिमलाई निरन्तरता दिइने बताए । अर्का वडा सदस्य सूर्यबहादुर वाग्लेले वडाले आयोजना गरेको तालिम फगत तालिमका लागि मात्र नभएको भन्दै तालिमलाई उपयोगी र उपलब्धीमूलक बनाउनुपर्नेमा जोड दिए ।

तालिम सञ्चालनका लागि स्थानीय आमा समूहहरूले समन्वय गरेका थिए भने तालिममा १२० जना महिला प्रशिक्षार्थीहरूको सहभागिता रहेको थियो । तालिमको आवश्यकता र उद्देश्यका बारेमा किंग्स इन्टरनेशनल कलेज प्रालिका प्रबन्ध निर्देशक ठाकुर शर्माले प्रकाश पारेका थिए ।