पोखराका पत्रकार श्रीकान्त सापकोटालाई मातृशोक परेको छ । सापकोटाकी ममतामयी माता राधिका सापकोटाको ७३ वर्षको उमेरमा निधन भएको हो ।

पछिल्लो समय पक्षघातबाट समेत पीडित उनको गत मंसिर ८ गते हृदयघात भएपछि मणिपाल शिक्षण अस्पतालमा भर्ना गरी उपचार गरिएको हो । स्व. राधिकाको बुधबार नै सेती किनार गाईघाटमा अन्त्येष्टि गरिएको छ ।

२००६ सालमा भलाममा जन्मिएकी राधिकाको मादी गाउँपालिका ४ तारकाङ निवासी डिल्लीराम सापकोटासँग कान्छी श्रीमतीको रुपमा विवाह भएको थियो ।

उनले जन्माएका दुई छोरा श्रीकान्तसहित भुवन तथा छोरी सीतादेवी तिमिल्सिना छन् । पृथ्वीनारायण क्याम्पसमा प्राध्यापन गर्ने श्रीकान्त नेत्रहिन संघ कास्कीका अध्यक्षसमेत हुन् ।

श्रीकान्तका बाबु डिल्लीरामको २०६५ सालमै निधन भएको थियो । उनकी जेठीआमा बाटुलीतर्फ पाँच भाइ छोरा र तीन छोरी छन् । पाँच भाइ छोरामध्ये नेपाल पत्रकार महासंघ कास्कीका सदस्य विष्णुप्रसाद सापकोटा एक हुन् ।

प्रेस चौतारी कास्कीका साधारण सदस्य दीपक गोदारलाई भातृशोक परेकाे छ ।  गाेदारका भाइ सिनियर क्योकुसिन खेलाडीसमेत रहेका राजु गोदारको अष्ट्रेलियाकाे पर्थ नजिकै दुर्घटनामा परी निधन भएको हाे । पोखरा १७ घारीपाटनका राजु ९ वर्ष पहिले  अष्ट्रेलिया गएका थिए ।

उनको तीन महिना पहिले निधन भएपनि परिवारलाई दुतावासले केही दिन पहिले मात्रै खबर गरेको हो । राजु गोदारका श्रीमती, एक छोरा र एक छोरी छन् । उनीहरू नेपालमै छन् ।

प्रेस चौतारीद्वारा शोक व्यक्त

यसैबीच, प्रेस चौतारी कास्कीका पूर्व कार्यसमिति सदस्य श्रीकान्त सापकोटालाई मातृशोक परेकोमा प्रेस चौतारी कास्कीले शोक व्यक्त गरेको छ । यसैगरी, प्रेस चौतारी कास्कीका साधारण सदस्य दीपक गोदारलाई भातृशोक परेकोमा पनि प्रेस चौतारीले समवेदना प्रकट गरेको छ ।

सचिव रञ्जन अधिकारीले शोक विज्ञप्ति जारी गर्दै शोकको घडीमा रहेका सदस्यद्वय सापकोटा र गोदारका शोकसन्तप्तः परिवारजनमा हार्दिक समवेदना प्रकट गरेका छन् ।