महिला तथा युवाहरुलाई महिनैपिच्छे विभिन्न प्रशिक्षण तालिम दिँदै आएको पोखरा महानगरपालिका वडा नं. १५ कार्यालयले यस महिना पनि आफ्ना गतिविधिलाई निरन्तरता दियो ।

वडा नं. १५ मा रहेका क्रियाशील महिला दिदीबहिनीहरुलाई लक्षित गरी मादल बजाउने १० दिने तालिम प्रदान गरेको छ । वडाका ७५ जना भन्दा बढी महिलाहरु तालिममा सहभागी भए ।

तालिमका प्रशिक्षार्थीहरुलाई सोमबार प्रमाणपत्र वितरण गरेको छ । सो अवसरमा महिलाहरुले १० दिनको तालिमबाट जानेको मादल बजाउने प्रतिभालाई उजागर गरे । उनीहरुले मादल बजाउँदै गीत गाएर सहभागीलाई नचाए ।

वडा अध्यक्ष तोरणबहादुर बानियाँले विभिन्न कार्यक्रम गर्दा, रत्यौली तथा सांस्कृतिक कार्यक्रमहरु गर्दा अरु बोलाएर गर्नुभन्दा आफै जानेपछि सहज हुने बताए । यसले समय र पैसाको वचत गरी महिलाहरुको कार्यक्रम पनि राम्रो हुने बताए ।

वडाले हालैमात्र १५ असारमा रोपाइँ महोत्सव तथा किसानहरुलाई नगदसहित पुरस्कृत र सम्मान गरेको छ ।

यस्तै, ७५ जनालाई कौसी खेती तालिम, फोहोर व्यवस्थापन तालिम र फोहोर व्यवस्थापनका लागि ५०% अनुदानमा बिन बितरणका साथै ५÷५ किलो प्राङ्गरिक मल निःशुल्क वितरण समेत गरेको छ ।