पोखरा । अनेरास्ववियु, कास्कीको सहसचिव घाेषणा गरिएका विवेक ओझाले संगठनलाई विधान र प्रक्रिया सम्झाउँदै पद अस्वीकार गरेका छन् ।

यहि साउन ५ गते अनेरास्ववियु जिल्ला कमिटी कास्कीको सम्पन्न अधिवेशनले विधान र प्रक्रिया विपरित कमिटी घोषणा गरिएको भन्दै उनले  आपत्ति जनाएका हुन् । अधिवेशनमा परेको उम्मेदवारीमा निर्वाचन हुनुपर्नेमा अध्यक्ष मण्डलले आफूखुसी कमिटीको घोषणा गरेको उनको आरोप छ ।

उपाध्यक्षमा एक मात्र उम्मेदवारी आफ्नो परेको र छलफलका नाममा अध्यक्ष मण्डलले सचिवमा उम्मेदवारी परेका २ जनालाई उपाध्यक्षमा घोषणा गर्नु विधान विपरित रहेको भन्दै पद अस्विकार गरेका हुन् ।

उनले लेखेका छन्ः ‘अनेरास्ववियुको विधान अनुरुप १० पालिका, २५ स्ववियु हुने क्याम्पस र १०० मावि रहेका ९ सदस्यीय कमिटी बनाउन मिल्ने प्रावधान रहेको छ । तर यो प्रावधान अनुरुपको मापदण्ड कास्कीमा मेल खाँदैन । प्रावधान अनुसार ७ सदस्यीय कमिटी बन्नुपर्ने थियो । प्रक्रियालाई मान्ने हो भने अन्य कोही पनि उम्मेदवारी दर्ता नगरिएको उपाध्यक्ष पदमा मेरो स्वतः घोषणा हुनुपर्ने थियो । तर अध्यक्ष मण्डलले उपाध्यक्ष पदमा सचिवका दुई आकांक्षीलाई राखेर मलाई सहसचिवमा राखि ९ सदस्यीय कमिटी घोषणा विधान सम्मत पनि छैन । अन्त्यमा विद्यार्थी आन्दोलनको यात्रामा मेरो पाइला राकिएको छैन । विधान र प्रक्रिया विपरित घोषणा गरिएको कमिटीमा मलाई दिएको सहसचिवको जिम्मेवारीलाई वहन गर्न असमर्थ रहेको जानकारी गराउँदै राजिनामा दिएको जानकारी गराउँदछु ।’