पोखराको होटलमा जुवाखालबाट पक्राउ परेकामध्ये एकजना गाउँपालिका अध्यक्ष नै भएको खुलेको छ ।

सिर्जनाचोक स्थित होटल लक्ष्मीमा विहीबार जुवा खेलिरहेका बेला पक्राउ परेका जुवाडेको टोलीमा मुस्ताङको घरपझोङ गाउँपालिका अध्यक्ष पनि रहेको खुलेको हो । गाउँपालिका अध्यक्ष मोहनसिंह लालचनसहित ७ जनालाई प्रहरीले साँझ पक्राउ गरेको थियो ।

उनीहरूको साथबाट ४ लाख ४७ हजार ८० रूपैयाँ बरामद गरेको वडा प्रहरी कार्यालय बैदामका डीएसपी वेदप्रकाश जोशीले जानकारी दिए ।
अध्यक्ष लालचनले आफ्नो नाम पूरा नभनी मोहन थकाली मात्र भनेका थिए । यो नाम गण्डकन्यूजमा प्रकाशन भएपछि मुस्ताङका केही युवाले फोन गरेर यस्तो नाम यो ठाउँमा नभएको जानकारी दिए ।

यसबारे बुझ्दा प्रहरीलाई नै पूरा नाम नभनी नाम फेरेको पाइयो । पक्राउ पर्ने अन्यमा हाेटल सञ्चालक मुस्ताङ घोरपझोङका ५७ वर्षीयका इन्द्रबहादुर हिराचन, नविनप्रसाद थकाली, सिर्जनाचोकका शंकर ज्वारचन, पोखरा महेन्द्रपुलका गुन्ज हिराचन, रामबजारका राजु गुरुङ र रामबजारकै दलबहादुर हिराचन छन् ।

सातै जनालाई आज म्याद थप गरी अनुसन्धान गर्ने प्रहरीको तयारी छ ।

सम्बन्धित समाचारः

पोखरा सृजनाचोकको होटल लक्ष्मीबाट ४ लाख बढी नगदसहित ७ जुवाडे पक्राउ