कास्कीका प्रहरी प्रमुख एसपी अजय केसीको सरुवा भएको छ । उनको नेपाल प्रहरी अंगरक्षक गण, नक्सालमा सरुवा भएको हो । कास्कीमा अख्तियार दुरुपयोग अनुसन्धान आयोग प्रहरी महाशाखा, टंगालबाट मोहनकुमार थापा आउँदैछन् ।

प्रहरी प्रधान कार्यालयले ४८ जना प्रहरी उपरीक्षक (एसपी) को सरुवा गरेको हो । कार्यअवधि पूरा भएका एसपीहरुको मानव स्रोत विकास विभागले शुक्रबार राति सरुवा गरेको हो। सरुवासँगै एसपी इन्चार्ज रहने कास्कीसहित १४ जिल्लाका प्रमुख फेरिएका हुन् ।

कस्तो रह्यो एसपी केसीको कार्यकाल ?

प्रहरी प्रधान कार्यालयले ०७९ साउन ६ गते एसपी अजय केसीलाई कास्कीको जिम्मेवारी दिएको थियो । समग्र शान्ति सुरक्षाको अवस्था हेर्दा गत वर्ष कास्की सन्तोषजनक नै रहेको कास्कीबासीले महसुस गरेका छन् । अपराध तथा लागुऔषध नियन्त्रणमा संगठनमा अब्बल दरिएका केसी जिल्लाको कमाण्ड गरुन्जेल यसैमा केन्द्रीत भए ।

टीममा विश्वास राख्ने एसपी केसीले कुशलतापूर्वक कार्य गर्ने ८९ जनालाई पुरस्कृत र प्रहरी आचरण विपरित काम गर्ने ४९ जनालाई कारबाही गरे । पब्लिसिटी र स्टन्ट नरुचाउने एसपी केसी मिडियामैत्री प्रहरी अफिसर रहे । मिडियालाई सूचना प्रवाहमा कुनै कञ्जुस्याईं गरेनन् । अन्तर्गतका ईलाका तथा वडा कार्यालय प्रमुखहरुलाई स्वतन्त्रतापूर्वक काम गर्न दिएको प्रहरी अधिकारीहरु बताउँछन् । राम्राे काम गर्ने जुनिअरलाई  सधैं हाैस्याइरहे ।

उनकै कमाण्ड अवधिमा प्रतिनिधि तथा प्रदेशसभा निर्वाचनमा कास्की सुरक्षित तबरले मतदान तथा मतगणना कार्य सम्पन्न भयो । यति एयरलाइन्सको दुर्घटनामा प्रहरीले अन्तसम्म आफ्नो जिम्मेवारी पूरा गरेकाे थियाे । ट्राफिक राजश्व संकलन ७ करोड संकलन, ग्रामीण गस्ती, प्रहरी कार्यालयहरुमा सीसी क्यामेरा जडानलगायतका कार्य भयो । जिल्लाभर १७३४ मुद्धा दर्ता भएकोमा ११५९ फर्छ्याैट र अरु प्रक्रियामा रहेको पत्रकार सम्मेलन गरी जानकारी गराएको छ ।

साइबर अपराधबारे सचेतना जगाउँदै विद्यालयहरुमा कार्यक्रम, सामाजिक सञ्जालको उच्चतम् प्रयोग गरी नागरिकसँग निकटता, सेवामैत्री भवन व्यवस्थापन लगायतका कार्य भएको कास्की प्रहरीले जनाएको छ ।

एसपी केसीको कार्यकलामा गत महिनासम्म भए गरेका प्रहरी कामकारबाही हेर्नुहोस्: