रूपन्देहीको बुटवलस्थित कालिकानगरमा राष्ट्रनिर्माता पृथ्वीनारायण शाहकाे सालिक स्थापना गरिएको छ ।

सिद्धार्थ राजमार्गको बुटवल-बेलहिया सडकखण्डअन्तर्गत बुटवल उपमहानगरपालिका-१०, कालिकानगरमा शाहकाे पूर्ण कदकाे सालिक स्थापना गरिएको हाे । बुटवलकाे कालिका मानविज्ञान माध्यमिक विद्यालयको मुख्य प्रवेशद्वार भन्दा उत्तरतर्फकाे सडकको बीचमा पृथ्वीनारायण शाहको सालिक निर्माण गरिएको छ ।

बुटवल-१० का स्थानीयहरूले राष्ट्र निर्माणमा शाहकाे महत्त्वपूर्ण याेगदान रहेकाले सालिक निर्माण गरेको बताएका छन् । सालिक निर्माणका लागि बुटवल उपमहानगरपालिका र वडा कार्यालयबाट समेत रकम विनियाेजन गरिएको थियो । गत २७ पुसमा वडाध्यक्ष बलु पुनले शिलान्यास गरेको सालिक निर्माणमा अगुवाइ गरेका राप्रपाका नेता रुपसिंह थापाले बताए ।

थापाका अनुसार शाहकाे सालिक २७ पुसमा पृथ्वी जयन्तीका दिन अनावरण गरिनेछ । ढलाेटबाट निर्माण गरिएको शाहकाे पूर्ण कदकाे सालिक ७ फिटकाे रहेको छ ।

बुटवलको गोलपार्कमा त्रिभुवन, महेन्द्रपार्कमा महेन्द्र, चाराहमा वीरेन्द्रको सालिक थियो । ती शालिक भत्काएर त्यहाँ कांग्रेस कम्युनिष्ट नेताको सालिक स्थापना गरिएको छ । कानून र इतिहासका अध्यापक युवराज कंडेलले एकछिनको आवेगमा सालिक भत्काएर कसैको इतिहास मेट्न नहुने बताउँछन् ।

‘बनाइएका सालिकले त्यो क्षेत्रमा पहिचान बनाइसकेका थिए, त्यो फालेर के क्रान्ति भयो ? भौतिक वस्तुले इतिहास संरक्षण गर्ने हो, नयाँ बनाउनेले नयाँ ठाउँमा खोजेको भए हुने थियो, विश्वका धेरै देशमा इतिहास संरक्षणमा यस्ता पुराना सालिक देख्न पाइन्छ, तर यहाँ भावना र उत्तेजनाको राजनीति बढी भयो’, उनको टिप्पणी छ ।