पोखरा । नेकपा एमाले गण्डकी प्रदेशको पहिलो प्रदेश अधिवेशन आजदेखि पोखराको अमरसिंहमा सुरू भएको छ ।

पार्टी अध्यक्ष केपी शर्मा ओलीले उद्घाटन गर्ने भनिएको थियो । तर, मौसम खराबीका कारण जहाज चल्न नसक्दा उनी आउन सकेनन् । ओलीको अनुपस्थितिमा महासचिव शंकर पोखरेललाई प्रमुख अतिथि बनाइएको छ । यतिबेला उनी मन्तव्य राखिरहेका छन् ।

एतिहासिक प्रथम अधिवेशन पार्टी अध्यक्ष केपी ओलीले उद्घाटन गर्ने तय भएपनि प्रतिकुल मौसम कारण उडान प्रभावित हुँदा उद्घाटन समारोह खल्लो हुन पुगेको हो । एमाले गण्डकीले ११ जिल्लाबाट आज ५० हजार कार्यकर्ता पोखरा उतार्ने भन्दै तयारी गरेको थियो । आजै झरीले पनि अवरोध गरेको थियो ।

एमाले गण्डकी प्रदेशका उपसचिव एवम्, प्रचारप्रचार उपसमिति संयोजक रश्मि आचार्यले प्रतिकुल मौसमका कारण उडान प्रभावित हुँदा उद्घाटन समारोह केही समय रोकिएको बताएका थिए । उनले पार्टी अध्यक्ष ओली जहाजमा आउने भएकाले प्रतिकुल मौसमका कारण उडान रोकिँदा केही समय ढिलाई भएको बताएका थिए । तर, साढे ३ बजेसम्म पनि उडान नभएपछि महासचिव नै प्रमुख अतिथिका रूपमा मञ्चमा निम्त्याइए ।

उद्घाटन समारोह ढिला हुन पुग्दा आएका पार्टीका नेता कार्यकतालाई भुलाउन सांस्कृतिक कार्यक्रमलाई अगाडि बढाएको थियाे । धिवेशनमा गण्डकीका ११ जिल्लाबाट ९ सय ७ जना प्रतिनिधि छनोट भएर पोखरा आएका छन् । यस्तै पोखरामा अधिवेशनका लागि आएका प्रतिनिधि राख्न एमालेले २१ वटा होटल बुक गरेको छ ।

प्रथम अधिवेशनमा पोखराको हस्पीटल चोक, औद्योगिक क्षेत्र (शिव चोक), बुद्ध चोक र बसपार्कबाट ¥यालीसहित अमरसिंह चौरमा पुगेका थिए ।

आज र भोलि हुने अधिवेशनबाट नेतृत्व चयन हुनेछ । नेकपा एमाले गण्डकी प्रदेश अध्यक्ष नवराज शर्माले सकेसम्म सहमतिबाट नभए मेसिन भोटिङबाट नेतृत्व चयन गरिने जानकारी दिए ।