लमजुङ । लमजुङको मर्स्याङदी गाउँपालिकाले पालिका अन्तर्गतका ज्येष्ठ नागरिकहरूमा निःशुल्क एम्बुलेन्सको व्यवस्था गर्ने भएको छ ।

गाउँपालिकाले विभिन्न समस्या भएर स्वास्थ्य उपचारका निम्ति आवश्यक परेका खण्डमा ७० वर्ष माथिका ज्येष्ठ नागरिकहरूलाई निःशुल्क एम्बुलेन्सको व्यवस्थापन गर्ने भएको हो ।

गाउँपालिकाको यस अघि भएको गाउँ सभाबाट नीति तथा कार्यक्रमबाट नै ज्येष्ठ नागरिकहरूलाई स्वास्थ्य उपचारका लागि निःशुल्क एम्बुलेन्स व्यवस्थापन गर्ने निर्णय पारित भएको थियो । सोही निर्णयलाई कार्यान्वयनमा ल्याइएको गाउँपालिका अध्यक्ष अर्जुन गुरुङले बताएका छन् ।

गाउँपालिकाले ज्येष्ठ नागरिकहरूलाई स्वास्थ्यमा समस्या भएर उपचारका निम्ति जिल्ला अस्पतालसम्म पुग्नु पर्ने भएमा वा जिल्ला अस्पतालबाट फर्कनु पर्ने भएमा गाउँपालिकाको आफ्नै एम्बुलेन्स मार्फत निःशुल्क सेवा दिने भएको हो । जिल्ला अस्पताल भन्दा बाहिर जानु परेमा भने सो सेवा उपलब्ध गराउन नसकिने गाउँपालिकाले जनाएको छ ।

पालिका भरिका ज्येष्ठ नागरिकहरूलाई समूह बनाएर विभिन्न चरणमा विभिन्न धार्मिक स्थलहरूको धार्मिक भ्रमण गराउने योजना बनाएको गाउँपालिकाले जनाएको छ । सो बाहेक गाउँपालिकाले ज्येष्ठ नागरिकहरूको निःशुल्क स्वास्थ्य परीक्षण पनि गर्ने जनाएको छ । विभिन्न वडा स्वास्थ्य केन्द्रमा कार्यरत कर्मचारीहरूलाई गाउँ टोलमा खटाएर ज्येष्ठ नागरिकहरूको नियमित निःशुल्क स्वास्थ्य परीक्षण गरिने गाउँपालिका अध्यक्ष गुरुङको भनाई छ ।

गाउँपालिकाले यसअघि देखिनै जेष्ठ नागरिक मध्ये ६० वर्ष माथिका एकल पुरुषहरूलाई नियमित भत्ता रकम पनि उपलब्ध गराउँदै आएको जनाएको छ ।