साहसिक खेल प्याराग्लाइडिङ अन्ततः आइतबारदेखि तोरीपानीबाट सुरु भएको छ । पोखरा अन्तर्राष्ट्रिय विमानस्थलको कारण देखाउँदै पोखरा–१८ को तोरीपानीबाट करिब ४ किलोमिटर टाढाको दूरी पोखरा–२४ को मान्द्रेढुंगाबाट स्थानान्तरण भई सञ्चालन गरिएको प्याराग्लाइडिङ पुनः पहिलाकै स्थान तोरीपानीबाट सुरु भएको नेपाल हवाई खेलकुद संस्थाका अध्यक्ष सुनिलबहादुर भट्टराईले बताए ।

जनवरी १ देखि विगत साढे नौ महिनासम्म स्थानान्तरण भएको प्याराग्लाइडिङ पहिलाको स्थानमा आएसँगै प्याराग्लाइडिङ व्यवसायमा थप केही आशा जगाएको व्यवसायीहरू बताउछन् । घटस्थापनाको दिनदेखि पुरानै स्थान तोरीपानीबाट प्याराग्लाइडिङको उडान हुने भएपछि उक्त क्षेत्रमा मर्मत–सम्भार एवं सरसफाइ गरिएको थियो ।

अब आफूहरूलाई पोखराको आकाशमा पहिलाको तुलनामा केही बढी क्षेत्र प्राप्त गरेसँगै अब ल्यान्डिङको विषयमा पनि पहिलाकै स्थान खपौदीमा ल्यान्डिङका लागि माग गरिएको उनले बताए । आफूहरूले हाल अन्तर्राष्ट्रिय स्तरको प्याराग्लाइडिङको उडान भर्ने स्थल बनाउने गरी कार्पेटसमेत बिच्छ्याउने गरी काम गरेको अध्यक्ष भट्टराईले बताए ।

करिब ८ लाख रुपैयाँको लागतमा उक्त मर्मत–सम्भार एवं सरसफाइ र कार्पेट बिच्छ्याउने काम गरिएको हो । पोखरा अन्तर्राष्ट्रिय विमानस्थलको कारण हाल पोखरामा बिहान ११ बजेदेखि दिउँसो ३ बजेसम्मका लागि नेपाल नागरिक उड्डयन प्राधिकरण (क्यान)ले अनुमति दिएको छ । आफूहरूले क्यानसहित पर्यटन विभाग तथा मन्त्रालयहरूमा पोखराबाट सोलो प्याराग्लाइडिङ गर्नेसमेत अनुमति माग गरेको अध्यक्ष भट्टराईले जनाए ।

पोखरामा फस्टाउँदै आएको साहसिक खेल प्याराग्लाइडिङ स्थानान्तरण भएसँगै हिजोआज करिब पाँच गुणाले खस्केको व्यवसायीहरूको गुनासो छ । पोखरा अन्तर्राष्ट्रिय विमानस्थल सञ्चालन हुनुपूर्व पोखराबाट दैनिकजसो ५ सय आन्तरिक तथा बाह्य पर्यटकहरूले प्याराग्लाइडिङ गर्दै आए पनि हाल स्थानान्तरण भएसँगै हिजोआज भने पहिलाको तुलनामा ५ गुणाले घटेर १ सय जनाको हाराहारीमा पुगेको निवर्तमान अध्यक्ष कृष्ण भण्डारीले दाबी गरे ।

पोखरा–६ का वडा अध्यक्ष विष्णुबहादुर भट्टराईले प्याराग्लाइडिङ उडान गर्दा हाल १२ हजार रुपैयाँ लिनुले यसको क्रेज घट्दो रूपमा रहेको दाबी गरे । खेलकुद संस्थाका महासचिव खेमराज आचार्यले हाल पोखरा क्षेत्रमा ६२ वटा प्याराग्लाइडिङ कम्पनी रहेको उल्लेख गर्दै १० जना महिलासहित ३ सय ९९ जना प्याराग्लाइडिङ पाइलट रहेको बताए । पोखरामा सिकारु प्याराग्लाइडिङ पाइलटलाई समेत अनुमति दिनुपर्ने व्यवसायीहरूको माग छ ।

सम्बन्धित समाचारः

पोखरामा प्याराग्लाइडिङ पुरानै स्थानबाट सञ्चालन हुने, मान्द्रेढुङ्गा अपायक