बहुपति प्रथाको विषयमा निर्मित नेपाली वृत्तचित्र फिल्म ‘को–हजबेन्ड’ (सहायक श्रीमान्) ले क्यानडामा नगद पुरस्कारसहित उत्कृष्ट सर्ट फिल्म अवार्ड जितेको छ ।

क्यानडाको टोरोन्टोमा आयोजित ३६ वर्ष पुरानो प्रतिष्ठित सोसाइटी अफ भिजुअल एन्थ्रोपोलोजी फिल्म एण्ड मिडिया फेस्टिबलमा को–हजबेण्डले तीन सय अमेरिकी डलरसहित उत्कृष्ट सर्ट फिल्म अवार्ड जितेको हो ।

मेट्रो टोरोन्टो सम्मेलन केन्द्रमा आयोजित अवार्ड समारोहमा फिल्म फेस्टिबलका सहनिर्देशकद्वय युनिभर्सिटी अफ साउर्दन क्यालिफोर्नियाकी एशोसियट प्रोफेसर जेनिफर कुल र युनिभर्सिटी अफ कोलारोड बोउल्डरका एशोसियट प्रोफेसर क्रिश्चियन ह्यामन्सले को–हजबेण्डका निर्देशक गणेश पाण्डे र निर्मात्री शारदा गैरेलाई पुरस्कार हस्तान्तरण गरेका हुन् ।

निर्देशक पाण्डेले विश्वका प्रतिष्ठित प्राध्यापक र मानवशास्त्रीहरूको माझमा पुरस्कार थाप्न पाउँदा निकै खुसी र गर्व लागेको बताए ।

को–हजबेन्डले यसअघि पनि विश्वका प्रतिष्ठित महोत्सवमा विभिन्न अवार्ड जितिसकेको छ । बहुपति प्रथामा आधारित ३५ मिनेटको वृत्तचित्र फिल्म कर्णाली प्रदेशको हुम्लामा छायांकन गरिएको हो । घरमा रहेका सबै दाजुभाइका लागि एउटै श्रीमती बिहे गर्ने संसारकै अनौठो चलनलाई निर्देशक पाण्डेले पर्दामा उतारेका हुन् ।

यसअघि पनि निर्देशक पाण्डेको बहुचर्चित डकुमेन्ट्री फिल्म ‘भाग्यले बाँचेकाहरु’ (नेपाल अर्थक्वेकः हिरोज, सर्भाइभर्स एण्ड मिराकल्स)ले पनि डेढ दर्जन अन्तर्राष्ट्रिय अवार्ड जितेको थियो ।

अमेरिकन एन्थ्रोपोलिजिकल एसोसिएसन र क्यानेडियन एन्थ्रोपोलोजी सोसाइटीले ३६ वर्षदेखि हरेक वर्ष अन्तर्राष्ट्रिय सम्मेलनसँगै फिल्म र मिडिया महोत्सव गर्दै आएको छ ।

अमेरिका र क्यानडासहित विश्वका विभिन्न देशबाट ५ हजार जना मानवशास्त्रीहरुको सहभागितामा यस वर्ष टोरोन्टो सम्मेलन केन्द्रमा सम्मेलनका साथै फिल्म र मिडिया महोत्सव भइरहेको छ । महोत्सवमा संसारभरका मानव शास्त्र र समाजशास्त्रसँग सम्बन्धित हजारौँ चलचित्र तथा वृत्तचित्र प्रदर्शनमा राखिएको छ । ती मध्ये नेपालको को–हजबेण्डलाई उत्कृष्ट अवार्ड घोषित भएको हो ।