पोखरामा जारी केपी ओली कप टि–२० क्रिकेट प्रतियोगितामा शनिबार शसस्त्र प्रहरी बलको एपीएफ क्लब र कर्णाली प्रदेशले जीत निकालेका छन् ।

एपीएफले लुम्बिनी प्रदेशलाई र कर्णाली प्रदेशले आयोजक मदन भण्डारी स्पोर्टस् एकेडेमी ‘रातो’ लाई पराजित गरेको हो ।

पोखरा रंगशालाको क्रिकेट मैदानमा भएको खेलमा एपीएफले लुम्बिनीलाई ८४ रनले पराजित गरेको छ । १५२ रनको लक्ष्य पाएको लुम्बिनीले निर्धारित २० ओभरमा ९ विकेट गुमाउँदै ६७ रन मात्रै बनाउन सफल भयो ।

एपीएफका अरुण ऐरीले ५ विकेट लिए । भुवन कार्कीले २, अभिनाष बोहरा र अमर रौटालाले १/१ विकेट लिए ।

लुम्बिनीका मिर्नल गुरुङले सर्वाधिक १४ रन जोडे । रोशन गुप्ताले अविजित १३ रन बनाउनु बाहेक अन्य ब्याटरले दोहोरो अंकमा रन बनाउन सकेनन् ।

टस जितेर पहिले ब्याटिङ गरेको एपीएफले निर्धारित २० ओभरमा ७ विकेट गुमाउँदै १५१ रन बनाएको थियो । एपीएफका लोकेश बमले विष्फोटक पारी खेले । बमले १३ बलमा ३ चौका, ३ छक्काको मद्दतमा ३२ रन जोडे ।

एपीएफ पहिलो खेलमा गण्डकी प्रदेशसंग ४ विकेटले पराजित भएको थियो । तसर्थ सेमिफाइनल प्रवेशको सम्भावना जिवितै छ ।

शनिबारको पहिलो खेलमा कर्णाली प्रदेशले आयोजक मदन भण्डारी स्पोर्टस एकेडेमी ‘रातो’ लाई ४ विकेटले पराजित गरेको छ ।

मदन भण्डारी ‘रातो’ ले दिएको ११० रनको लक्ष्यलाई कर्णाली प्रदेशले १८.१ ओभरमा ६ विकेट गुमाउँदै पुरा गरेको थियो । ११० रनको लक्ष्यलाई पुरा गर्ने क्रममा दिपेन्द्र रावतले अविजित ४३ रनको योगदान दिए ।

मदन भण्डारीको ‘रातो’ लगातार २ खेल हार्दै प्रतियोगिताबाट बाहिरिएको छ ।

आइतबार पहिलो खेलमा गण्डकी प्रदेशसँग लुम्बिनी भिड्नेछ । नेपाल पुलिस क्लबसँग मधेश प्रदेश मैदान उत्रनेछ ।

मदन भण्डारी स्पोर्टस् एकेडेमीले आयोजना गरेको प्रतियोगिता बिहीबार सुरु भएको हो । मंसिर १५ गतेसम्म चल्ने प्रतियोगितामा सातै प्रदेशको टोलीसँगै विभागीय नेपाल पुलिस क्लब, त्रिभुवन आर्मी क्लब, सशस्त्र प्रहरी बलको एपीएफ क्लब र आयोजक मदन भण्डारी स्पोर्टस् एकेडेमिका २ टोलीले प्रतिस्पर्धा गर्नेछन् ।

विजेताले ५ लाख रुपैयाँको साथमा सिल्ड मेडल र प्रमाणपत्र प्राप्त गर्दा उपविजेताले २ लाख ५० हजार रुपैयाँमा चित्त बुझाउनेछ ।

म्यान अफ द सिरिजले नगद ३० हजार रुपैयाँ, बेस्ट बलरले नगद २० हजार रुपैयाँ र म्यान अफ द म्याचले नगद ५ हजार रूपैयाँ नगद प्राप्त गर्नेछन् ।