तनहुँ । तनहुँमा जिप दुर्घटना हुँदा चालकसहित ५ जना घाइते भएका छन्।

मंगलबार बिहान ४ बजे आबुखैरेनी गाउँपालिका –४ पावर हावस स्थित पृथ्वी राजमार्ग सडक खण्डमा आबुखैरेनी तर्फबाट मुग्लिङ तर्फ जाँदै गरेको बा १७ च ७९६० नम्बरको बोलेरो जीप सडकबाट करिब १५० मिटर तल खसेर दुर्घटना भएको हो।

उक्त दुर्घटनामा परी घाइते हुनेहरूमा जिप चालक कैलालीको धनगढी नगरपालिका –४ बस्ने वर्ष २७ को दयाराम राना, सुर्खेत वीरेन्द्र नगरपालिका –६ बस्ने वर्ष २८ को थानेश्वर भट्टराई सोही नगरपालिकाको –९ बस्ने वर्ष २८ को निबस खत्री, दार्चुलाको महाकाली नगरपालिका –५ बस्ने वर्ष २४ को राकेश भट्ट र कैलालीको गोदाबारी नगरपालिका –३ बस्ने वर्ष ३० को खगेन्द्रराज पनेरु रहेका छन्।

घाइतेहरुमध्ये पनेरुलाई थप उपचारको लागि पुरानो मेडिकल भरतपुर, चितवनमा पठाइएको र अन्य चार जनाको आँबुखैरेनी अस्पतालमा उपचार भइरहेको जिल्ला प्रहरी कार्यालय तनहुँले जनाएको छ।