काठमाडौं। माल्टा पठाइदिन्छु भन्दै ठगी गरेको अभियोगमा प्रहरीले २ जनालाई पक्राउ गरेको छ।

वैदेशिक रोजगारीका लागि माल्टा पठाइदिन्छु भन्दै पीडितहरूबाट रकम उठाएर ठगी गरी फरार भएको अभियोगमा प्रहरीले दुई जनालाई आइतबार दिउँसो पक्राउ गरेको हो।

पक्राउ पर्नेहरूमा मोरङ सुन्दरहरैचा नगरपालिका-८ घर भइ हाल काठमाडौंको टोखा -५ धापासी बस्दै आएका क्यापिटल मेनपावरको संचालक ४४ वर्षीय टंक प्रसाद सुवेदी र झापा बिर्तामोड नगरपालिका -४ घर भइ हाल ललितपुर – १५ सातदोबाटो बस्दै आएका ३४ वर्षीय विक्रम दाहाल छन् ।

प्रहरीका अनुसार उनीहरूले वैदेशिक रोजगारीका लागि माल्टामा प्रतिष्ठित होटलमा मासिक ८० हजार रूपैयाँ तलबमा काम लगाइदिन्छु भन्दै प्रलोभनमा पारी पीडितहरूबाट कूल ८ लाख ९० हजार ठगी गरेका थिए । उनीहरूले रकम ठगेको भन्दै पीडितहरूले जाहेरी दिएपछि उपत्यका अपराध अनुसन्धान कार्यालय मिनभवनबाट खटिएको प्रहरीको टोलीले टंकलाई बसुन्धरा र विक्रमलाई ललितपुर सातदोबाटोबाट पक्राउ गरेको हो ।

उनीहरूलाई थप अनुसन्धान तथा कारवाहीको लागि वैदेशिक रोजगार विभाग ताहाचल काठमाडौं पठाइएको कार्यालयले जनाएको छ ।