युवा पुस्तामाझ चर्चित गायिका हुन् एलिना चौहान । मेला महोत्सवमा उनले गाउने धोकेबाज हौ तिमी गीत र भिडियो भाइरल बन्दा चर्चा झनै चुलिएको छ ।

ठाउँठाउँका महोत्सवमा उनले यो गीत गाउँदा सुरक्षाकर्मीलाई भीड व्यवस्थापन गर्न गाह्रो देखिन्छ । उनले स्टेजमा गाइरहँदा महोत्सवमा सहभागी युवतीहरु रुँदै, छाती पिट्दै गरेका दृश्य भाइरल भइरहेका देखिएका छन् ।

पोखरामा चाहिँ युवतीहरुले के गर्लान् ? त्यो हेर्न भने महोत्सव पुग्नुपर्छ । पोखराको अमरसिंह खेल मैदानमा जारी बाह्र्रौँ संस्करणको पोखरा महोत्सवमा आज शुक्रबार एलिना चौहान र मन्त्र ब्याण्डको प्रस्तुती रहने भएको छ ।

महोत्सवको नवौँ दिन दिउँसोको स्टेज शो मा एलिना चौहान र साँंझको लाइभ ब्याण्डमा दार्जिलिङको चर्चित ब्याण्ड मन्त्र ब्याण्डको प्रस्तुती रहने महोत्सव प्रचार प्रसार संयोजक दिनेश सुनारले जानकारी दिए ।

महोत्सवमा शुक्रबार एलिनासंगै जिवन दाहाल, शिवहरी ढुंगाना, निश्चल दवाडी, सबिना गुरुङ, शान्ता बर्देवा, माधव चाँपागाई, कमला गैरे, बिनिता क्षेत्री, सुरेश भुर्तेल लगायतको प्रस्तुती रहने छ ।

महोत्सवमा बिहीबार चर्चित लोकदोहोरी गायक बद्री पंगेनीको प्रस्तुतीमा दर्शकहरुले भरपुर मनोरन्जन लिए ।

बद्रीले धेरै धेरै बधाइ छ छाडिजानेलाई, पैैसा सापटी, रातो गलबन्दी, झ्याउरेको तालैमा, चप्पलै छिनियो, ससुरालीमा, पञ्चेबाजा, कान्छि हे कान्छि लगायतको गित मार्फत दर्शकहरुलाई भरपुर मनोरन्जन दिलाएका थिए । बद्री संगै बिहीबार जीवन दाहाल, शिवहरी ढुंगाना, नेत्र खड्का, नवराज अधिकारी, टस गुरुङ, नेत्रपाणी बास्तोला, रमा राना, पुजा गुरुङ लगायतको प्रस्तुती रहेको थियो ।

त्यसैगरी, सांझको लाइभ ब्याण्डमा सबिन राई एण्ड द फेरोहको लाइभ कन्सर्टमा युवाहरु झुमेका थिए ।

महोत्सवको आठौं दिनमा जारि रहदा दर्शकको भीड लागेको छ भने महोत्सवमा राखिएका स्टलहरुमा ब्यापार समेत बढेको छ । महोत्सवमा जाडोयामका लत्ता कपडा, घरायसी सामाग्री किन्नेको भीड लागेको छ । त्यसैगरी महोत्सवमा भेषभूषामा तस्विर खिचाउने, हिमाली याकको अवलोकन गर्ने, नेपाल टेलिकमको निशुल्क सिम लिने, घोड सवार गर्नेको समेत भीड लागेको छ ।

महोत्सवमा अनलाइन मार्फत रेभल एपबाट घरमै बसेर समेत महोत्सवमा आउने दर्शकले टिकट काट्न सक्ने र हरेक दिन तीन जनालाई निःशुल्क टिकटको समेत व्यवस्था गरिएको छ ।