पोखरा महानगरपालिकाले सबै भवन तथा संरचना हरियो रङको हुनुपर्ने नीति ल्याएको छ ।

आज बुधबार महानगरपालिकाले सार्वजनिक गरेको पोखरा महानगरपालिका भवन तथा पूर्वाधार मापदण्ड २०८० मा पोखरालाई ‘ग्रिन सिटी’को रुपमा विकास गर्न यो नीति ल्याएको हो ।

पोखराका भवन तथा पूर्वाधार निर्माण मापदण्ड सार्वजनिक गर्दै मेयर धनराज आचार्यले पोखराका घर भवनमा हरियो रङ लगाउने योजना पूरानै भएपनि अहिले कार्यान्वयन गर्न लागिएको उल्लेख गरे ।

‘स्याङ्जामै पुतलीबजार पर्पल सिटी छ । वालिङ पिंक सिटी छ । अब पोखरा पनि हरित सहरको रुपमा ग्रिन सिटी बन्नेछ’ मेयर आचार्यले भने ।

यस्तै, पोखरा महानगरपालिकामा अब बन्ने घर तथा भवन ५ तलासम्म बनाउन महानगरले दिने भएको छ । यसअघि पोखरामा साढे ३ तलासम्म मात्रै बनाउन पाइने मापदण्ड थियो । तर, जग्गा र पैसा हुनेले मनलाग्दी घर तथा संरचना बनाउँदै आएका थिए ।

आज बुधबार महानगरपालिकाले सार्वजनिक गरेको पोखरा महानगरपालिका भवन तथा पूर्वाधार मापदण्ड २०८० मा ५ तलासम्म अग्लो घर तथा भवन बनाउन पाइने नीति छ । तर, घर बनाउनु अघि माटो परीक्षण गर्न भने अनिवार्य छ ।

मापदण्ड राजपत्रमा प्रकाशित भएपछि कार्यान्वयनमा जानेछ ।