करेन्ट प्रवाह भइरहेको बिजुलीको तार गुडिरहेको बसमाथि खस्यो भने त्यसपछिको अवस्था कति भयाभह होला ? भाग्यवश, यस्तो हुनबाट जोगिएको छ ।

पोखरामा बुधबार बिहान गुडिरहेको स्कूल बसलाई एक्कासी पोल भाँचिएर किच्यो । लत्रिएको तार बसभन्दा थोरै माथि हुँदा त्यसभित्र रहेका बालबालिका जोगिएका छन् ।

पोखरा नदीपुरस्थित न्यू ग्यालेसी माविको बस विद्यार्थी लिन जानेक्रममा बिहान साढे ९ बजे लामाचौरस्थित भक्ति पथमा पुगेको थियो । ठीक त्यसैबेला सिमेन्टको विद्युत खम्बा ढल्यो र बसलाई किच्यो । सौभाग्यले करेन्ट प्रवाह भइरहेको तारले थोरै मात्रले बसलाई छोएन र त्यसभित्रका सबैजना विद्यार्थी, चालक, सहचालक बाँच्न सकेका हुन् ।

विद्यालयका संस्थापक प्राचार्य डा. रामजी शर्माका अनुसार बस गुडिरहेकै अवस्थामा बिजुलीको पोल भाँचिएर बसमाथि परेको हो ।

‘बिहान ब्यस्त बाटोमा विद्यार्थी बोकिरहेको स्कुल बस माथि करेन्ट सहितको बिजुलीको पोल अचानक भाँच्चिएर खस्यो । भाग्यवस यो एम्बुसबाट स्थानीय जनताको क्वीक रेस्क्यूका कारण विद्यार्थीहरू जोगिन सफल भएका छन्’, शर्माले भने – ‘बसमा खम्बा अल्झिएकाले ब्यस्त समयमा हिँडिरहेका पैदलयात्रुहरू पनि करेन्टबाट जोगिन सफल भए । जीर्ण विद्युत खम्बाबारे जिम्मेवार निकायको गैरजिम्मेवार प्रतिक्रिया आयो ।’

पोखराका जीर्ण विद्युत पोल तथा खम्बाहरु मर्मत तथा फेर्न ढिलाई गर्न हुँदैन ।

यसअघि, २०७४ साउन २६ गते पोखराको शिशु निकेतन तथा राष्ट्रिय माविका शिक्षक विष्णु बस्ताकोटी रानीपौवामा मोटरसाइकलमा गुड्दै गर्दा बिजुलीको तार चुडिएर खसी एक्कासी करेन्ट लागेको थियो । अढाइ महिना लामो उपचारपछि पनि निको हुन नसकेका उनको २६ वर्षको उमेरमै मृत्यु भएको थियो ।