पोखरा । आठौं पोखरा स्पोर्ट्स अवार्डमा नेपाल पर्यटन बोर्ड गण्डकी प्रदेश प्रवर्द्धक रहने गरी सम्झौता भएको छ ।

नेपाल खेलकुद पत्रकार मञ्च गण्डकीले आगामी २१ वैशाखमा पोखरा सभागृहमा स्पोर्टस् अवार्ड गर्दैछ । बुधबार मञ्चतर्फबाट अध्यक्ष दीननाथ बराल र बोर्डतर्फबाट नि.प्रमुख नवीन पोखरेल, वरिष्ठ अधिकृत कुन्दन शर्मा मिश्रबीच सम्झौतापत्रमा हस्ताक्षर भएको हो । सो अवसरमा मञ्च सदस्य रोहितराज पराजुलीसमेत उपस्थित थिए ।

सो अवसरमा बोर्डका नि.प्रमुख नवीन पोखरेलले गण्डकी प्रदेशको खेल पर्यटन प्रवर्द्धक गर्न यस्ता कार्यक्रमले थप टेवा पुग्ने विश्वास गरिएको बताए । सहयोगप्रति आयोजक मञ्च अध्यक्ष बरालले आभार व्यक्त गर्दै आगामी दिनमा यस्तै सहयोग र सहकार्यको अपेक्षा गरेको बताए।

मझेरी रिसोर्ट एण्ड स्पाले होटल पाटर्नर रहने भएको छ । राष्ट्रिय खेलकुद परिषद्, साहस स्पोर्टस् लगायत संघसंस्थाले सहयोग गर्ने सम्झौता भइसकेको मञ्चले जनायो ।

समारोहमा लाइफटाइम अचिभमेन्ट अवार्डसहित वर्ष खेलाडी पुरुष, वर्ष खेलाडी महिला, वर्ष उत्कृष्ट प्रशिक्षक, वर्ष उदीयमान खेलाडी, वर्ष उत्कृष्ट खेलकुद संघसंस्था वा क्लब र वर्ष उत्कृष्ट खेल पत्रकार गरी ७ विधामा अवार्ड दिइने मञ्च महासचिव राजाराम पौडेलले बताए ।