पोखरा । सर्वोच्च अदालतले तत्कालका लागि पदमा फर्काएसँगै गण्डकी प्रदेशसभा सदस्य फणिन्द्र देवकोटा आज प्रदेशसभा बैठकका लागि पुगे । तर, प्रदेश सभा बैठकमा प्रवेश गर्न लागेका फणिन्द्रलाई मर्यादा पालकले रोक लगाए । उनी ढोकाबाटै फर्किए ।

गण्डकी प्रदेश सभाका सभामुख कृष्णप्रसाद धितालले तयारी नपुगेका कारण सांसद देवकोटालाई बैठकमा सहभागी नबनाइएको बताएका छन् ।

पार्टीको ह्वीप विपरीत मुख्यमन्त्रीलाई विश्वासको मत दिएको भन्दै फणिन्द्रमाथि जेठ ३२ गते माओवादी केन्द्रले कारबाही गरेको थियो । तर, सर्वोच्च अदालतले कारबाही तत्कालका लागि कार्यान्वयन नगर्न आदेश दिएसँगै फणन्द्रिको पद जोगिएको थियो ।

बैठकपछि सभामुख धितालले भने‘केही तयारी नपुगेको कारणले उहाँलाई सहभागी नबनाएको हो । यो प्राविधिक कुरा हो । मैले अध्ययन पनि गर्न पाएको थिएन । कानूनी साथीहरुसँग सल्लाह गरेर प्रक्रिया अगाडि बढाउँछु ।’

मुख्यमन्त्री कार्यालयबाट भने सांसद फणिन्द्र देवकोटालाई मन्त्रीको सपथ खुवाउन प्रदेश प्रमुख कार्यालयलाई  तयारी गर्न भनिसकेको थियो । उनलाई मन्त्री पदमा पुनः नियुक्ति गरी आज विहीबार साँझ ५ः३० बजे सपथ खुवाउने तयारीमा मुख्यमन्त्री थिए । तर, संसदमै प्रक्रिया नसकिएकाले नियुक्ति र सपथ भएन ।

मुख्यमन्त्री सुरेन्द्रराज पाण्डेलाई विश्वासको मत दिएर सत्तामा काँग्रेस स्थापित गरिदिएका फणिन्द्रले उपहार स्वरुप उर्जा तथा जलश्रोत मन्त्रालय पाएका थिए । सांसद पद गएसँगै उनको मन्त्री पनि गएको थियो । पाण्डेले अहिले सोहि मन्त्रालयमा पुनः नियुक्ति गर्न लागेका हुन् ।

सपथका लागि प्रदेश प्रमुख कार्यालयले सबै तयारी गरिसकेको थियो ।