पोखरा । तनहुँकी एकजना नाबालिकालाई अपहरणपछि बन्धक बनाएर बलात्कार गरेको अभियोगमा प्रहरीले भारतीय नागरिकसहित दुई जनालाई पक्राउ गरेको छ ।

असार १७ गते बिहान ११ बजे तनहुँको म्याग्दे गाउँपालिका ४ थर्पुबाट नाबालिकालाई फकाएर पोखरा रानीपौवामा रहेको कोठामा ल्याई रातको समयमा सामूहिक बलात्कार गरेको खुलेको प्रहरी नायव उपरीक्षक बसन्तकुमार शर्माले बताएका छन् ।

नाबालिकालाई ग ८ प ४२८० नम्बरको मोटरसाइकलमा राखेर पोखरा महानगरपालिका ११ रानीपौवास्थित कोठामा ल्याइएको प्रहरीले जनाएको छ । पोखरा ल्याएर ती नाबालिकालाई दुवैजनाले सामूहिक बलात्कार गरेको प्रहरीले जनाएको छ ।

पक्राउ पर्नेमा धनुषाको क्षिरेश्वरनाथ गाउँपालिका १० गोपालपुर घर भई पोखरा ११ रानीपौवा बस्ने २१ वर्षीय अरूण कुमार दास र भारतको बिहार प्रदेश सीतामढी डुमरा थाना सुरसड पक्ष्मी १ सुरसड गाउँका १९ वर्षीय सुनिल दास भन्ने सुनिल कुमार रहेका छन् ।

नाबालिकालाई बन्धक बनाएर बलात्कारपछि पोखराबाट तनहुँ फर्किने क्रममा पोखरा महानगरपालिका ३० पावरहाउसबाट प्रहरीले दुवै जनालाई पक्राउ गरेको हो । उनीहरूविरूद्ध कास्की जिल्ला अदालतबाट अपहरण, शरीर बन्धक तथा जबरजस्ती करणीसम्बन्धी मुद्दामा ८ दिन म्याद लिएर अनुसन्धान भइरहेको जानकारी प्रहरीले दिएको छ ।