कास्की । यहाँको चर्चित पदयात्रा मार्ग मर्दी हिमाल ट्रेक रुटमा मानव कंकाल फेला परेको छ । खुट्टाको नलीहाड जस्तो देखिने हड्डी, मोबाइल र लगाएको कपडा (ट्रयाकसुट) फेला परेको हो ।

माछापुच्छ्रे आधार शिविर नजिकै लामडाँडा खोँचमा कंकाल र बोकेका तथा लगाइएका सामाग्री भेटिएको हो । शरीरको मासु तथा अन्य हाडको नामोनिशान भेटिएको छैन भने कपडाहरु च्यातिएको अवस्थामा फेला परेको छ ।

भेडीगोठालोले निगालोघारी नजिकै कंकाल फेला पारेका हुन् । भालुले खाएर हाडखोर मात्र बाँकी रहेको हुनसक्ने अनुमान छ ।

कपडा र मोबाइल चिन्न सक्ने अवस्थामा रहेकाले शव धेरै पूरानो नभएको अनुमान गर्न सकिन्छ ।

मर्दी ट्रेकमा गएका स्वीडेनी नागरिक गएको वर्ष पुस १४ गतेबाट हराइरहेका छन् । मिचेल लिउ ब्लोमवर्ग नाम गरेका २२/२३ वर्षका युवक मर्दी हाई क्याम्पबाट बिहानै ४ बजे बेस क्याम्प जान्छु भनी हिँडेका थिए ।

झोला होटलमै छोडेर टर्च लाईट र बोतलमा पानी लिएर बेस क्याम्पका लागि उनी निस्किएका थिए । उनी हराएपछि हेलिकोप्टरसहित खोजी गर्दा पनि केही पत्तो लागेको थिएन।

यस्तै, सन् २०१८ मा पदयात्रामा गएकी नेदरल्याण्डकी कोरी पनि बेपत्ता भइन् । फेब्रुअरी २० मा मर्दी पदमार्गको हाइक्याम्प स्थित होटल ट्रेकर्स प्याराडाइजबाट बेस क्याम्प चढेर मौसम खराब भन्दै पुनः हाइक्याम्प झरेर उनी माछापुच्छ्रे होटलमा बसेकी थिइन् ।

छोरी रेइनलाई म्यासेज पठाएर २१ फेब्रुअरीमा पुनः बेसक्याम्पका लागि बाटो तताएकी उनी फर्किनन् । त्यस दिनदेखि उनको अत्तोपत्तो छैन । आमा जिन वर्षेनी छोरी भेट्ने आशमा नेपाल आइरहन्छिन् तर अझै लास समेत पाएको अवस्था छैन ।

कोरी वेपत्ता भएको ६ वर्ष वितिसकेकाले शव उनको हुने सम्भावना छैन । तर, स्वीडेनी युवक ७ महिना अघिदेखि मात्र हराएकाले उनको हुनसक्ने सम्भावना छ ।

थप विवरण प्राप्त हुन बाँकी ।