काठमाडाैँ । नुवाकोटको सूर्यचौरमा एयर डाइनेस्टीको हेलिकप्टर दुर्घटनामा सवार सबै ५ जनाको मृत्यु भएको छ ।

घटनास्थलमा उद्धारका लागि खटिएका प्रहरीका अनुसार मृत्यु हुनेमा ४ पुरुष र १ महिला छन् ।

बुधबार दिउँसो काठमाडौंबाट रसुवाको स्याप्रुवेशीतर्फ उडेको एयर डाइनेष्टीको नाइन एन-एजेडी कलसाइन भएको हेलिकप्टर शिवपुरी ७ स्थित सुर्यचौरमा हेलिकप्टर दुर्घटना भएको हो ।

‘दुर्घटना भएको ठाउँमा दनदनी आगो बलिरहेको छ । जान सकिएको छैन ।’ जिल्ला प्रहरी कार्यालय नुवाकोटका डिएसपी तिलक भारतीले भने ।

‘चार जना यात्रु र एक जना पाइलटको शव घटनास्थलमा फेला परेको छ,’ उनले भने, ‘दुई जना पुरूष, एक जना महिला, एक जना पाइलट र अर्का एक जनाको शव जलेको हुनाले अहिले पहिचान हुन सकेको छैन।’

यो हेलिकप्टर काठमाडौंबाट १ बजेर ५४ मिनेटमा उडेको थियो। उडेको तीन मिनेटपछि हेलिकप्टर सम्पर्कविहीन भएको थियो। बाक्लो कुहिरोले ढाकेको डाँडामा हेलिकप्टर खसेको हो ।