बागलुङ जिल्लाको सदरमुकाम बागलुङ बजारदेखि झन्डै १५ किमि दक्षिण र समुद्री सतहदेखि झन्डै दुई हजार मिटरको उचाइमा रहेको बलेवा कालभैरव मन्दिरमा यही भदौ ४ गते तेस्रो हरेलो मेला लाग्ने भएको छ ।

वर्षाको समयमा रोपेको धानमा मुसा नलागोस्, बाली नमासियोस्, बाली सहजै भित्र्याउन सकियोस् र अन्न घेरै राम्रो उत्पादन होस् भन्ने कामना गर्दै हरेक वर्ष भदौको पहिलो मङ्गलवार हरेलो पर्व मनाउने प्रचलन बागलुङमा छ। बागलुङ नगरपालिकाको विशेष सहयोग रहेको यो मेलामा १३ लाख रुपैयाँ आम्दानी र १० लाख ९२ हजार ५ सय रुपैयाँ खर्च हुने अनुमान गरिएको छ ।

मेलाको उद्घाटन गर्न नेपाल उद्योग बाणिज्य महासंघका केन्द्रीय अध्यक्ष चन्द्रप्रसाद ढकाल आउने भएका छन् । बलेवा कालभैरवको धार्मिक एवं सांस्कृतिक प्रचारप्रसार र प्रवर्द्धनका लागि ‘तेस्रो हरेलो मेला’को तयारी गरिएको बताइएको छ ।

बागलुङ नगरपालिका वडा नम्वर १० भकुण्डे , ११ रायडाँडा , १२ अमलाचौर ,१३ पैयुँपाटा ,१४ नारायणस्थान र जैमिनी नगरपालिका १ को कोटको रुपमा समेत रहेको मन्दिर परिसरमा भदौ महिनाको पहिलो मंगलबार मेला लाग्ने गर्दछ ।

मेलामा भकुण्डेको झाम्रे, रायडाँडाको भजन, अमलाचौरको गन्धर्व गित प्रस्तुती, पैयुँपाटाको नौमती बाचा, नारायणस्थानको लाखे र कुश्मिसेराको सालैजो विशेष पस्तुतीको रुपमा रहनेछ । मेलामा खुल्ला छेलो प्रतियोगिताका साथै ख्याति प्राप्त कलाकारहरु जिवन दाहाल, कृष्ण अखेली, सीता परियार, आशा विसी, रेशम निर्दोष र सुदिप क्षेत्रत्रीको सांगीतिक प्रस्तुति रहनेछ ।

भैरवस्थान मन्दिर जिल्लाकै मुख्य धार्मिक पर्यटकीय क्षेत्रको रुपमा परिचित छ । मेलाको अवसरमा ३५ हजार आन्तरिक पर्यटकले भैरवस्थान मन्दिरको दर्शन गर्ने अपेक्षा गरिएको छ । भैरवको पूजा गर्दा आँटेको पुग्छ भन्ने विश्वासका साथ विभिन्न क्षेत्रबाट दर्शनार्थीहरु आउने गर्छन् ।