म्याग्दीका प्रहरी निरीक्षक राजन रायमाझीसहित आठ जना उत्कृष्ट प्रहरी पुरस्कृत भएका छन् ।

६९ औंँ प्रहरी दिवसको अवसरमा बुधबार जिल्ला प्रहरी कार्यालय म्याग्दीले एक कार्यक्रमको आयोजना गरी उनीहरुलाई पुरस्कार वितरण र सम्मान गरेको हो ।

प्रहरी निरीक्षक राजन रायमाझी, प्रहरी सहायक निरीक्षक बलबहादुर खड्का, प्रहरी हवल्दार दिपक आले, प्रहरी सहायक हवल्दार खेम परियार, अम्मरबहादुर क्षेत्री, प्रहरी जवान चित्रबहादुर गुरुङ, सविता कुम्हाल र नविन सिंजालीलाई पुरस्कृत गरिएको थियो ।

प्रमुख जिल्ला अधिकारी गुरुदत्त ढकाल, जिल्ला न्यायाधिवक्ता गोविन्द उपाध्याय लगायतले उनीहरुलाई सम्मान गरे ।

सोहि कार्यक्रममा प्रहरी दिवसको अवसरमा आयोजित खेलकुद प्रतियोगितामा विजयी प्रहरी कर्मचारीहरुलाई पुरस्कृत गरिएको थियो ।

कार्यक्रममा प्रमुख जिल्ला अधिकारी ढकालले कानुन कार्यान्वयन, शान्ति सुरक्षा कायम र अपराध अनुसन्धानमा प्रहरीको महत्वपूर्ण भूमिका रहेका बताए ।

प्रहरी नायव उपरीक्षक भरत श्रेष्ठले नयाँ परिवेश र प्रविधीको विकाससँगै सिर्जना भएका चुनौतिहरु सामना गर्न नेपाल प्रहरीले आफ्नो क्षमता र जनमैत्री कार्यशैली अपनाएको बताए । पुर्व प्रहरी संगठन म्याग्दीका अध्यक्ष भिमबहादुर श्रेष्ठले पनि शुभकामना व्यक्त गरेका थिए ।

प्रहरी निरीक्षक सागर पौडेलले सञ्चालन गरेको कार्यक्रममा अर्का प्रहरी निरीक्षक राजन रायमाझीले स्वागतका साथै प्रहरी महानिरीक्षक बसन्त कुँवरको शुभकामना सन्देश बाचन गरिएको थियो ।