अमेरिकाविरुद्धको टी–२० सिरिज नेपालले एक खेलअगावै जितेको छ । आइतबार बिहान सम्पन्न खेलमा अमेरिकालाई सुपर ओभरमा हराउँदै नेपालले सिरिज एक खेलअगावै जितेको हो । पहिलो खेलमा नेपाल १७ रनले विजयी भएको थियो ।

निकै रोमाञ्चक बनेको दोस्रो खेलमा उत्कृष्ट कमब्याक गर्दै नेपालले खेल सुपर ओभरमा धकेल्यो । सोपमाल कामीले सानदार बलिङ गर्दा सुपर ओभरमा अमेरिकाले दुई विकेट गुमाएर दुई रन मात्र बनाउन सक्यो । तीन रनको लक्ष्य नेपालले चौथो बलमा पूरा गर्‍यो ।

निर्धारित २० ओभरको खेलमा नेपालले दिएको १ सय ७१ रनको लक्ष्य पछ्याएको अमेरिकाले ८ विकेट गुमाएर १ सय ७० रन बनाएपछि नतिजा सुपर ओभरबाट लिइएको हो ।

अन्तिम ओभरमा अमेरिकालाई जितका लागि ७ रन चाहिएको थियो । तर, सोमपालको उत्कृष्ट बलिङका कारण उसले अन्तिम ओभरमा ६ रन जोड्दा दुई विकेट गुमायो ।

अमेरिकाका लागि एन्ड्रिज गौसले ४३ बलमा चार छक्का र तीन चौकासहित सर्वाधिक ६२ रन बनाए । यस्तै, साइतेजा मुक्कामल्लाले ४७, मिलिन्द कुमारले १५ र शायन जहाँगीरले १४ रन जोडे । नेपालका लागि बलिङमा करण केसीले ४ ओभरमा ३५ रन दिएर तीन विकेट लिए ।

यस्तै, सोमपाल कामीले ४ ओभरमा ३४ रन खर्चेर दुई विकेट हात पारे । सागर ढकाल र दीपेन्द्र सिंह ऐरीको नाममा एक/एक विकेट रह्यो । त्यसअघि डालासस्थित ग्रान्ड प्रेरी मैदानमा टस जितेर ब्याटिङ रोजेको नेपालले निर्धारित २० ओभरमा ६ विकेट गुमाएर १ सय ७० रन बनायो ।

नेपालका लागि कुशल भुर्तेलले आक्रामक पारी खेले । ५४ बलको सामना गरेका उनले ६ छक्का ७ चौकाको मद्दतमा अविजित ९२ रनको पारी खेलेका हुन् । टी–२० आईमा कुशलको यो नवौँ अर्धशतकीय पारी हो । उनी यस खेलमा ‘प्लेयर अफ द म्याच’ घोषित भए ।

यस्तै, दोस्रो खेलमा अनिलकुमार साहले २५, गुलशनकुमार झाले १९ र कप्तान रोहितकुमार पौडेलले १८ रन जोडे । करण केसीले एक बलमा अविजित ६ रन बनाए । उनले अन्तिम बलमा छक्का हिर्काउँदै उत्कृष्ट फिनिसिङ गरे ।

अमेरिकाका लागि नोस्तुश केन्जिगे र जसदीप सिंहले दुई/दुई तथा सौरभ नेत्रावल्करले एक विकेट लिए । यो जितसँगै सिरिजमा नेपालले २–० को अग्रता लिएको छ । नेपाल र अमेरिकाले तेस्रो टी–२० आई सोमबार खेल्ने तालिका छ ।

नेपाल र अमेरिका आइसिसी विश्वकप लिग–२ को तयारीस्वरूप टी–२० सिरिज खेलिरहेका हुन् । आसन्न लिग–२ सिरिजमा नेपालले २७ अक्टोबर र २ नोभेम्बरमा अमेरिका तथा २९ अक्टोबर र ४ नोभेम्बरमा स्कटल्याण्डको सामना गर्नेछ ।