बागलुङ पश्चिमबासीलाई सहज रूपमा स्वास्थ्य सेवाको पहुँच बनाउन गण्डकी प्रदेश सरकार लागिपरेको प्रदेश सरकारले जनाएको छ ।

गण्डकी प्रदेशका स्वास्थ्य मन्त्री कृष्ण प्रसाद पाठकले सोमबार बुर्तिबाङ स्वास्थ्य केन्द्रको निरीक्षण गर्दै बुर्तिवाङमा गण्डकी प्रदेश स्तरीय अस्पताल निर्माणको काम अन्तिम चरणमा रहेको जानकारी दिए ।

पाठकले मंसिर दोश्रो साता उद्घाटन हुने यस अस्पतालबाट सेवा लिएर यहाँका नागरिकले राहतको अनुभूति लिन सक्ने पनि बताए ।

मन्त्री पाठकले भने – ‘यहाँका सांसद सहित स्थानीय तहका जनप्रतिनिधि लगायतको उपस्थितिमा पटक पटक तत्कालीन मुख्य मन्त्री, संघ सरकार, स्वास्थ्य मन्त्रालयमा ध्यानाकर्षण गराइएको थियो । अब अस्पताल निर्माण र आवश्यक प्रकृया पूरा भइसकेका कारण मंसिरको दोश्रो हप्तासम्म अस्पत्तालको उद्घाटन गरिनेछ ।’

मन्त्री पाठकले आफनो कार्यकालमा सुगममा भन्दा बढि दुर्गम क्षेत्रको स्वास्थ्य क्षेत्रको विकास र पहुँचका लागि ध्यानकेन्द्रित गरेको बताउँदै आफू डेढ सय बढी महत्वपूर्ण योजना र लक्ष्य निर्धारण गरेर स्वास्थ्य क्षेत्रको सुधारमा अघि बढेको उल्लेख गरे ।

स्वास्थ्यमन्त्री पाठकले बुर्तिबाङमा ५० शैयाको अस्पताल सञ्चालन गर्न भौतिक पूर्वाधार पर्याप्त रहेको बताउँदै यसबर्ष आँपपिपल र बुर्तिबाङ अपस्तालका लागि चालु र पूँजीगत गरी कूल १२ करोड बजेट सुनिश्चत भइसकेको बताए ।

कार्यक्रममा ढोरपाटन नगरपालिका कार्यवाहक मेयर धन बहादुर कायतले यस क्षेत्रका नागरिकले स्वास्थ्य क्षेत्रमा निकै सास्ती खेपिरहेको अवस्थामा ढोरपाटन नगरपालिकाले कर्मचारी र आवश्यक बजेट व्यवस्थापन गरेर केही सेवा सुविधा उपलब्ध गराएकोमा अब चाँडै प्रदेश मातहतबाट सञ्चालन हुँदै अब सहज हुने विश्वास व्यक्त गरे ।

कार्यक्रममा स्वास्थ्य मन्त्रालय गण्डकी प्रदेशका अधिकृत प्रशान्त शर्माले अस्पतालबाट चाँडै सेवाको सुरुवात हुने बताए ।

बुर्तिबाङ स्वास्थ्य केन्द्रका प्रमुख डा. नविन्द्र ढकालले यहाँको वर्तमान अवस्था, आवश्यक पुर्वाधार, जनशक्तिको आवश्यकता र बजेटका सन्दर्भमा धारणा राख्दै मन्त्रीसमक्ष अस्पतालको रिर्पाट प्रस्तुत गरे ।

उनका अनुसार गतबर्ष मात्रै ३५ हजार बढी नागरिकले स्वास्थ्य संस्थाबाट सेवा लिएका थिए । बागलुङका ४ पालिका सहित गुल्मी, रुकुम लगाएतका ठाउँबाट समेत विरामी आउने गरेको उनको भनाई छ ।

बुर्तिबाङ स्वास्थ्य केन्द्र व्यवस्थापन समितिका अध्यक्ष वान बहादुर छन्त्यालको अध्यक्षतामा भएको कार्यक्रम स्वास्थ्यकर्मी चुडामणी कँडेलले सञ्चालन गरेका थिए ।