नेपालले फिफा विन्डोअन्तर्गत खेलिएको त्रिदेशीय अन्तर्राष्ट्रिय मैत्रीपूर्ण फुटबलमा शनिबार अफगानिस्तानलाई २-० गोलले पराजित गरेको छ ।

पहिलो हाफमा बराबरी टुंगिएको थियो । दोस्रो हाफको एक मिनेट नबित्दै जिलेस्पीजँग कार्कीले गोल गरेर नेपाललाई अग्रता दिलाएका थिए । दोस्रो गोल ७८औँ मिनेटमा रोहित चन्दले गरेका थिए ।

अफगानी टिमले सुरुदेखि नै नेपाललाई दबाबमा राखेको थियो । नेपालले कमै अवसर पाएको थियो । तर पाएका दुई अवसरलाई सदुपयोग गरेको हो ।

अफगानी टिमले थुप्रै अवसर पाए पनि त्यसलाई नेपाली खेलाडीले विपल पारेका थिए । अफगानी टिममाथि वर्चस्व राख्दै आएको नेपालले डुसान्बेस्थित सेन्टर स्टेडियममा भएको मैत्रीपूर्ण खेलमा पनि निरन्तरता दिन सफल भएको छ ।

अफगानी राष्ट्रिय टिमसँग नेपालले ११ वर्षपछि खेलेको हो । सन् २०१३ मा काठमाडौंमा भएको साफ च्याम्पियनसिपमा नेपाल र अफगानिस्तानबीच प्रतिस्पर्धा भएको थियो ।

खेलमा अफगानिस्तानले नेपाललाई १-० ले पराजित गरेको थियो । सन् २००६ यता यी दुई टिमबीच ६ खेल भएको छ । त्यसमा नेपालले ३ र अफगानिस्तानले २ खेल जितेको थियो । एक खेल बराबरी टुंगिएको थियो । अफगानी टिम फिफा वरीयतामा नेपालभन्दा २५ स्थानमाथि छ ।

नेपालका मुख्य प्रशिक्षक नवीन न्यौपानेले फिफा वरीयतामा आफूभन्दा माथिको अफगानी टिमविरुद्ध सुझबुझका साथ खेलेकाले जित निकाल्न सफल भएका बताए ।

उनले भने, ‘अफगानसँग उत्कृष्ट प्रदर्शन गर्दै विरासत कायम राखेर सकारात्मक नतिजा निकाल्न चाहन्थ्यौं । त्यसमा सफल भएका छौँ ।’

नेपाल यसअघि घरेलु टोली ताजकिस्तानसँग ४-० ले हारेको थियो ।