सहकारी ठगी प्रकरणमा पक्राउ परेका पूर्वडीआईजी छविलाल जोशीलाई अनुसन्धानका लागि मंगलबार साँझ काठमाडौँ लगिएको छ।

कालिमाटीमा रहेको स्वर्णलक्ष्मी सहकारीको रकम अपचलनमा अनुसन्धानका लागि उनलाई आज कास्कीबाट काठमाडौँ लगिएको र बुधवारबाट बयान थालिने प्रहरीले जानकारी दिएको छ । कास्की प्रहरी प्रवक्ता डीएसपी वसन्तकुमार शर्माका अनुसार आज साँझ ५ः४५ बजेको यति एयरलाइन्सबाट उनलाई काठमाडौं पठाइएको हो ।

छविको बयान सकिएपछि मात्रै रास्वपाका सभापति रवि लामिछानेलाई काठमाडौँ लगिने भएको छ। छवी र रविविरुद्ध गत आइतवार मात्रै स्वर्णलक्ष्मी सहकारी ठगी प्रकरणमा काठमाडौँ जिल्ला अदालतबाट पक्राउ पुर्जी जारी भएको थियो।

लामिछाने जिल्ला प्रहरी कार्यालय कास्कीको हिरासतमा छन्। कास्की प्रहरीको हिरासतमा रहेका कुमार रम्तेललाई भने काठमाडौँ झिकाएर बयान लिइसकिएको छ। रम्तेल पोखरा फिर्ता भएपछि छविलाई बयानका लागि ल्याइएको हो।

यसअघि रुपन्देहीको सुप्रिम सहकारीको रकम अपचलनमा रवि र छविलाई लगेर बयान लिइसकिएको छ।