पोखरा । उच्च अदालत पोखराले गण्डकी प्रदेश सरकारको स्वास्थ्य मन्त्रालय सचिवबाट हटाइएका डा. विनोदविन्दु शर्मालाई तत्काललाई थमौती गरिदिएको छ । माघ ४ गते बसेको मन्त्रिपरिषद् बैठकले शर्मालाई हटाएर डा. विश्वबन्धु बगालेलाई जिम्मेवारी दिएको थियो ।

संघका कर्मचारीलाई सचिवको जिम्मेवारी दिएपछि डा. शर्मा अदालत पुगेका थिए । त्यसपछि अदालतले निर्णय कार्यान्वयन नगर्न बुधबार अल्पकालीन अन्तरिम आदेश जारी गरेको हो ।

प्रादेशिक स्वास्थ्य तालिम केन्द्रको महानिर्देशकमा पठाइएका डा। शर्माले उक्त निर्णयविरुद्ध उच्च अदालत पोखरामा मुख्यमन्त्री तथा मन्त्रिपरिषद्को कार्यालयलाई विपक्षी बनाएर रिट निवेदन दायर गरेका थिए। गत माघ ८ गते दायर रिटमा प्रारम्भिक सुनुवाइ गर्दै न्यायाधीश उमेश कोइरालाको इजलासले विपक्षीका नाममा बुधबार अल्पकालीन अन्तरिम आदेश जारी गरेको हो ।

आदेशपछि शर्मा बिहीबार स्वास्थ्य मन्त्रालयमै हाजिर भएका छन् । अल्पकालीन आदेश भएकाले उनी मन्त्रालयमै हाजिर भएपनि सचिवको जिम्मेवारीमा भने डा. बगाले नै छन् । अन्तरिम आदेशका लागि भने इजलासले माघ १४ गते दुवै पक्षलाई छलफलमा बोलाएको छ । अदालतले सो दिन रिटउपर फैसला गर्नेछ । त्यसपछि मन्त्रालयको सचिवमा को रहने भन्ने पक्का हुनेछ ।