पोखरा । सामाजिक सञ्जालमा एउटा भिडियो देखियो, जहाँ एक युवकले मोटरसाइकलको पछाडि डोरी बाँधेर कुकुरलाई रफ्तारमा दौडाइरहेका छन ।

कुकुर मोटरसाइकलकै रफ्तारमा दौडिरहेकाले निकै थकित छ र बाटोमै पछारिन्छ । त्यहीबेला मोटरसाइकलमा भिडियो बनाउँदै गएका युवकले देख्छन्, त्यसरी नघिसार्न आग्रह गर्छन्, पानी मगाउँछन्, खुवाउँछन् । कुकुर पनि उठ्छ । कुकुर घरबाट भागेकाले बाँधेर ल्याउनुपरेको बताउँदै ति युवकले भन्छन् – ‘यो हरामी नाटक गर्छ ।’

भैरहवाका आकृत पौडेल नामक युवकले पोखरा–स्याङ्जा सडकखण्डमा भ्लग बनाउने क्रममा खिचेको भिडियो आफ्नो फेसबुकमा रिल्स अपलोड गरेपछि भाइरल बन्न पुगेको हो । यो घटना ठ्याक्कै २ महिनाअघि भएको पाइएको छ ।

आकृतले आफ्नो युट्युब च्यानलमा २ जनवरी, २०२५ मै पोष्ट गरेका छन् । फेसबुकमा फेब्रुअरी २८ मा पुनः राखेका हुन् । सोहि भिडियोलाई पशुअधिकारकर्मी इरफान खानले पुनः अपलोड गरेपछि अनुसन्धान र कारबाही प्रक्रियाका लागि अघि बढेको हो ।

ग१७प ३९३१ नम्बरको मोटरसाइकलमा यसरी कुकुरलाई बाँधेर घिसारेको भिडियो बाहिरिएपछि जिल्ला प्रहरी कार्यालय कास्कीका प्रमुख एसपी श्यामबाबु ओलियाले तत्काल अनुसन्धान सुरु गरे ।

कुकुरलाई निकै निर्दयी भएर घिसार्ने पोखराकै युवक भएको खुलेको छ । ति युवक पोखरा महानगरपालिका वडा नंं. २२ पुम्दीभुम्दी घर भएका ३० वर्षीय खुशीराम बराल रहेको एसपी ओलियाले गण्डक न्यूजलाई जानकारी दिए ।

बराललाई वडा प्रहरी कार्यालय बैदामले नियन्त्रणमा लिएर अनुसन्धान जारी राखेको एसपी ओलियाले बताए । कानुनानुसार कारबाही गरिने उनले बताए ।

तस्वीरः आकृत पौडेलको भिडियोबाट ।