पोखरा । पोखराको पृथ्वीनारायण क्याम्पस (पिएनसी) मा स्वतन्त्र विद्यार्थी युनियन (स्ववियु)को मतदान सुरु भएको छ ।

गत चैत ५ र चैत ६ मा दुई पटक स्थगित भएको निर्वाचन आज आइतबार बिहान ८ बजेदेखि पुनः सुरु भएको हो ।

क्याम्पसभित्र ६ वटा केन्द्रमार्फत मतदान सुरु भएको निर्वाचन अधिकृत प्रा. डा रामचन्द्र पोखरेलले जानकारी दिए ।

उनका अनुसार ८ बजेदेखि सुरु भएको मतदानको समय ४ बजेसम्म तोकिएको छ ।

यसअघि मतपत्रमा त्रुटि देखिएपछि मतदान स्थगित भएको थियो ।

पृथ्वीनारायण क्याम्पसमा ९ हजार २७० मतदाता रहेका छन् । स्ववीयु सभापति पदका लागि ८ जना चुनावी मैदानमा उत्रिएका छन् ।

सभापतिका लागि नेविसंघबाट सुशील न्यौपाने, अनेरास्ववियुबाट विष्णु पोखरेल, अखिल क्रान्तिकारीबाट नवीन अधिकारी, अनेरास्ववियु समाजवादी, अखिल समाजवादी, अखिल क्रान्तिकारी (वैद्य)को संयुक्त प्यानलबाट सन्तोष पौडेल सभापतिका उम्मेदवार हुन् ।

अखिल छैटौंबाट मिलन सुनार र प्राज्ञिक विद्यार्थी परिषदबाट दिप्सन गुरुङले स्ववीयु सभापतिमा उम्मेदवारी दिएका छन् । स्ववीयु सभापतिका लागि कमल सुवेदी र विप्लवी न्यौपानेले स्वतन्त्र उम्मेदवारी दिएका छन् ।

०६५ पछि यस क्याम्पसमा स्ववियु निर्वाचन हुन सकेको थिएन ।