पोखरा । चर्चित प्रत्यक्ष दोहोरी कलाकार रेशम निर्दोष र नवप्रतिभा सिमरन परियार कतारको दोहातर्फ प्रस्थान गरेका छन् ।

बागलुङ सेवा समाजको प्रथम अधिवेशनमा हुने सांगीतिक कार्यक्रममा सहभागी हुन उनीहरु बुधबार राति ११ बजे दोहातर्फ प्रस्थान गरेका हुन् ।

संस्थाको प्रथम अधिवेशन शुक्रबार होटेल होलिडे भिल्ला दोहामा हुने संयोजक रमेश भट्टले जानकारी दिए । उनले कार्यक्रम स्थल आसपास रहने सम्पूर्ण नेपालीलाई उपस्थितिका लागि आग्रह गरे । अधिवेशनमा बागलुङ गृहजिल्ला रहेका नेपाल उद्योग वाणिज्य महासघका अध्यक्ष चन्द्रप्रसाद ढकाल प्रमुख अतिथि रहनेछन् ।

बाग्लुङ सेवा समाज दोहा, कतारको अगुवाइमा बहुउद्देश्यीय अक्षयकोष स्थापना गरेको छ । अक्षयकोष स्थापनाको घोषणा पनि शुक्रबारकै कार्यक्रममा हुनेछ । १ करोड रुपैयाँको कोषमार्फत दैवीप्रकोप उद्धार, सीपमूलक तालिम पर्यटन प्रवर्द्धन, प्रवासीको तथ्यांक संकलन, सम्मान र पुरस्कार प्रदान तथा रचनात्मक काम गर्ने लक्ष्य राखिएको छ ।

अक्षयकोषमा ५० लाख रुपैयाँभन्दा बढी संकलन भइसकेको छ ।