तनहुँ । तनहुँकी एक महिलाले ढुङ्गाले हानेर चारमहिने छोराको हत्या गरेकी छिन् ।

घिरिङ गाउँपालिका– ४ थामडाँकी ३६ वर्षीया कमला परियारले छोरा अर्जुन परियारको ढुङ्गाले हानी हत्या गरेको जिल्ला प्रहरी कार्यालय तनहुँले जनाएको छ ।

परियारले माइती घर नवलपुरको बौदीकाली गाउँपालिका अर्मलेमा जाने क्रममा छोराको हत्या गरेकी हुन् ।

प्रहरीका अनुसार माइतिघर जाने क्रममा मानपुर–डेढगाँउ सडक खण्डमा कमलाले सोमबार साँझ ७ बजे ढुङ्गाले हानी गम्भीर घाइते बनाएकोमा स्थानीय बासिन्दाले घाइते बच्चालाई उपचारका लागि रामपुर अस्पताल पाल्पामा लगेकोमा बालकको उपचारको क्रममा मृत्यु हो ।

हत्या गर्ने कमलालाई इलाका प्रहरी कार्यालय डेढगाउँ नवलपरासीले पक्राउ गरी थप अनुसन्धानका लागि जिल्ला प्रहरी कार्यालय तनहुँमा मङ्गलबार उपस्थित गराएको छ ।

प्रारम्भिक अनुसन्धान पूरा गरी परियारलाई कर्तव्य ज्यान मुद्दा शीर्षकमा तनहुँ जिल्ला अदालतबाट म्याद थप अनुमति लिई थप अनुसन्धान भइरहेको प्रहरीले जनाएको छ ।