पोखरा । नेपाल पत्रकार महासंघ कास्कीका पूर्व सदस्य एवं युवा नेता देवेन्द्र बास्तोलाको निधन भएको छ ।

पोखरा–११, फूलबारी निवासी ४६ वर्षका बास्तोलाको मोटरसाइकल दुर्घटनामा परी निधन भएको आफन्त सञ्जयकिशोर बास्तोलाले जानकारी दिए ।

शनिबार लेखनाथ तालबेसीमा उनी सवार मोटरसाइकल दुर्घटना भएको  हो । पत्रकारिता, समाजसेवा र राजनीतिमा क्रियाशील बास्तोला अघिल्लो स्थानीय तह निर्वाचनमा पोखरा–११ मा एमालेबाट अध्यक्ष पदका उम्मेदवारसमेत थिए ।

उनी हाल पोखरा न्यूरोडको पिपल्स बचत तथा ऋण सहकारी संस्थाका सचिव थिए । लामो समय मणिपाल शिक्षण अस्पतालमा समेत कार्य गरेका उनी विभिन्न सामाजिक संघसंस्थामा पनि आबद्ध थिए । उनका आमा, श्रीमती र ९ वर्षका छोरा छन् ।

उनको शव पोस्टमार्टमका लागि पोखरा स्वास्थ्य विज्ञान प्रतिष्ठानमातहतको पश्चिमाञ्चल क्षेत्रीय अस्पताल राखिएको छ । आइतबार अन्तिम संस्कार गरिने परिवारले जनाएका छन् । बास्तोलाको बुवाको गत मंसिरमा निधन भएको थियो ।