अवैध रुपमा उत्खनन तथा ओसारपसारमा प्रयोग भएका जेसिबीलगायतका सवारीसाधनहरु प्रहरीले नियन्त्रणमा लिएको छ ।

स्याङ्जाको अर्जुनचौपारी गाउँपालिका – ४ घट्टेस्थित दरौंखोलाको किनारबाट बिहीबार एउटा जेसिबी र एउटा ट्याक्टर नियन्त्रणमा लिइएको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक प्रशन्न राज चौधरीले जानकारी दिए ।

ग १ क ३३११ नम्बरको जेसिबी र ग १ त ५०२० नम्बरको ट्याक्टर प्रयोग गरेर अवैध रूपमा ढुङ्गा उठाउँदै गरेको अवस्थामा प्रहरी चौकी अर्जुनचौपारीबाट खटिएको प्रहरी टोलीले दुवै सवारीसाधनलाई नियन्त्रणमा लिएको डिएसपी चौधरीले जानकारी दिए ।

नियन्त्रण गरिएका सवारीसाधनहरु आवश्यक कारबाहीको लागि अर्जुनचौपारी गाउँपालिकाको कार्यालयमा बुझाइएको जिल्ला प्रहरी कार्यालय स्याङ्जाले जनाएको छ ।

यसैगरी, प्रहरीले पुतलीबजार नगरपालिका – १३ दरौंखोलास्थित मोटरबेल पुलबाट करिब २०० मिटरबाट ढुङ्गा लोड गर्दै गरेको अवस्थामा ग १ त ५२२७ नम्बरको ट्याक्टर नियन्त्रणमा लिएको थियो ।

नियन्त्रणमा लिएको उक्त ट्याक्टर आवश्यक कारबाहीको लागि पुतलीबजार नगरपालिकाको कार्यालयमा बुझाइएको स्याङ्जा प्रहरीले जनाएको छ ।