पोखरा वडा नं. १५ कार्यालयले वडामा रहेका युवाहरूलाई लक्षित गरी डिजिटल मार्केटिङ सम्बन्धी दश दिने तालिम सञ्चालन गरेको छ ।

वडा अध्यक्ष तोरण बहादुर बानियाँका अनुसार नेपालको दीर्घकालीन राष्ट्रिय सोच ‘समृद्ध नेपाल, सुखी नेपाली’, ‘डिजिटल नेपाल फ्रेमवर्क’ र ‘स्थानीय सरकार सुदृढीकरण तथा युवा सशक्तीकरण’ जस्ता नीतिगत दस्तावेजमा प्रतिवद्ध गरिएको लक्ष्य प्राप्त गर्न आयोजित यो तालिमले युवाको क्षमता अभिवृद्धि गर्दै उनीहरूलाई आधुनिक, प्रतिस्पर्धी र सशक्त जनशक्तिका रूपमा रूपान्तरण गर्ने दिशामा महत्वपूर्ण आधार बनाउने उल्लेख गरे ।

युवाहरूमा डिजिटल मार्केटिङको आधारभूत ज्ञान प्रदान गर्न प्रविधिमैत्री व्यवसायिक सोच र सीप विकास गर्न, स्वरोजगार र उद्यमशीलताको प्रोत्साहन गर्न स्थानीय उत्पादन तथा सेवा प्रवर्द्धनमा डिजिटल माध्यमको प्रयोगलाई प्रोत्साहित गर्न विद्यमान व्यवसायलाई डिजिटल ट्रान्सफर्मेसनतर्फ उन्मुख गराउने उद्देश्य राखिएको बानियाँले बताए ।

युवा लक्षित सीप विकास सम्बन्धी तालिमहरू वडाले निरन्तर गर्दै आइरहेको छ ।

वडा सचिव युवराज पौडेलका अनुसार शुक्रबारबाट सञ्चालन भएको तालिम असार १७ गतेसम्म चल्नेछ ।

तालिममा डिजिटल मार्केटिङको परिचय र करिअर सम्भावना, सर्च ईञ्जिन अप्टिमाइजेशन (एसईओ) को आधारभूत ज्ञान, सोसल मिडिया मार्केटिङ, कन्टेन्ट मार्केटिङ, कपीराइटिङ सीप, ईमेल मार्केटिङको परिचय र अभ्यास, गुगल एड र बुस्ट कन्सेप्ट, क्यान्भा प्रयोगमार्फत् डिजाइन सीप, डिजिटल मार्केटिङ ब्राण्डिङ स्ट्राटेजी, व्यवसायलाई अनलाइनमार्फत् प्रवर्द्धन, फ्रीलान्सिङ लगायतका विषयमा प्रशिक्षण दिइने उनले जनाए ।

तालिममा वडा नं. १५ भित्रका २३ जना युवाहरुको सहभागिता रहेको वडा सदस्य आशिष भण्डारीले जानकारी दिए । सिद्ध माध्यमिक विद्यालयको सूचना प्रविधि ल्याबमा तालिम सञ्चालन गरिएको छ ।