सिन्धुलीबाट शुक्रबार सम्पर्कविहीन भई सोमबार बेलुकी पोखरामा भेटिएका हायू परिवारले पोखराको पर्यटकीयस्थल घुमघाम गरेका छन् ।

सिन्धुलीको गोलन्जोर गाउँपालिका–६ छेत्पाबाट सम्पर्कविहीन भइ कास्कीको पोखरा महानगरपालिका– ३० गगनगौंडामा भेटिएका उर्मिला हायूका परिवारले आज बिहान पोखरा फेवातालबाट डुंगा शयर गरी बाराही मन्दिर दर्शन गरेका छन् ।

परिवार निकै खुशी भएर पोखरा घुमघाम गरिरहेको देखिन्छ ।

कास्की जिल्ला प्रशासनले उनीहरुलाई ज्वाइँ नाता पर्ने धनबहादुर तामाङको जिम्मा लगाएको छ । धनबहादुर हराएका मध्येकी कमला हायुका पति हुन् ।

सहायक प्रमुख जिल्ला अधिकारी शिव लम्सालका अनुसार उनीहरूलाई पोखरा महानगरपालिका–३० का वडा अध्यक्ष दुर्गाप्रसाद सुवेदीको रोहबरमा आफन्तको जिम्मा लगाइएको हो ।

उनीहरूलाई गगनगौंडामा फेला पारिएपछि इलाका प्रहरी कार्यालय, शिशुवा लगेर सोधपुछ गरिएको थियो ।

प्रहरीका अनुसार बेलाबेलामा बिरामी भइरहने र धामीले त्यहाँ नबस्न भनेपछि छेत्पाबाट हिँडेको उनीहरूले बताएका छन् ।

उनीहरू पोखरामा बस्ने योजनासहित नै आएको देखिने प्रहरीको भनाइ छ । एसपी श्यामबाबु ओलियाका अनुसार उनीहरुले पोखरामा ज्यामी काम गर्नका लागि आएको बताउँदै ती दुई घरमा डेरा लिएका थिए ।

उनीहरूले स्वेच्छाले नै गाउँ छाडेको बताएका छन् । ‘धेरै बिरामी हुने गर्न थाल्यो, धामीले गाउँ छाड्न भने । गाउँ पनि मन परेन भनेका छन्’ ओलियाले भने ‘हामी यतै बस्छौं । उता जाँदैनौं भनेका छन् । त्यहाँभन्दा अन्तै बस्ने व्यवस्था मिलाइदिन उनीहरूले आग्रह गरेका छन् ।’

एसपी ओलियाले उनीहरू सिन्धुलीबाट २० हजार रुपैयाँमा गाडी रिजर्भ गरेर पोखरा आएको खुलेको पनि बताए । शनिबार नै उनीहरु पोखरा आएर होटलमा बसेका थिए । पोखराको होटल जननीमा आएर तीन वटा कोठा लिएर बसेको र आइतबार नै बाहिरिएका थिए । होटलका सञ्चालक सुनिल भूर्तेलका अनुसार शनिबार आएर उनीहरू आइतबार नै होटलबाट चेक आउट गरेर निस्किएका थिए । उनीहरू होटलमा ५ हजार रुपैयाँ तिरेर आइतबार अन्यत्र लागेका थिए ।

सम्बन्धित समाचारः

हायू समाजले भन्योः आधारहिन प्रचारले सिन्धुलीकाे परिवारलाई अनावश्यक हैरानी दियो

सिन्धुलीबाट बेपत्ता परिवारका सबै सदस्य पोखरामा भेटिए

एकाएक गाउँबाट १६ जनाको पूरै परिवार गायब