देशको समसामयिक विषयवस्तुलाई समेटी लोकप्रिय सर्जक तथा गायक केशव घिमिरेले ‘गुहार गुहार’ बोलको तीज गीत लिएर आएका छन् ।

चन्दन डिजिटल म्युजिक प्रालिको प्रस्तुति रहेको गीतमा घिमिरेको स्वरसँगै शब्द र लय रहेको छ । लक्ष्मी बरालले गायनमा साथ दिएकी छन् ।

घिमिरे स्वयंले परिकल्पना र निर्देशन गरेको भिडियोको छायांकन गणेश सापकोटाले गरेका छन् भने सम्पादन सुवास अम्गाईले गरेका छन् ।

अंकिता सापकोटाको श्रृंगार, फलानो क्रियशनको दृश्य निर्माण रहेको गीतलाई घिमिरेकै नामको युट्युब च्यानलमा सार्वजनिक गरिएको छ ।

न्यून आय भएका, आम्दानी भन्दा खर्च धेरै भएर महङ्गीले निसास्सिएका सर्वसाधारण जनताको वास्तविक घटनालाई प्रस्तुत गर्न खोजिएको छ ।

चर्चित हाँस्यव्यंग्य कलाकार राजेन्द्र नेपाली लट्टे, टिकटकबाट उदाएकी कलाकार प्रतिक्षा अधिकारी, मुन्द्रेमान श्रेष्ठ , ऋषि पौडेल, कमल अर्याल लगायत कलाकारको अभिनय गीतमा देख्न पाइन्छ ।

करिब २ दशकदेखि सांगीतिक क्षेत्रमा अनवरत क्रियाशील घिमिरे पर्वत कार्किनेटाका हुन् । पोखरालाई कर्मथलो बनाएर उनी निरन्तर लोकसंगीत क्षेत्रमा लागिरहेका छन् । करिब २ सय गीत ल्याइसकेको बताउने घिमिरेको पछिल्लो गीतले पनि श्रोता दर्शकको मन छुने विश्वास राखेका छन् ।