स्याङ्जाको चापाकोट नगरपालिका –१०, बायोडाँडामा छ करोड रुपैयाँ खर्चेर निर्माण गरिएको भ्यु टावर अहिले सुनसान बनेको छ । पर्यटन प्रवर्द्धन गर्ने उद्देश्यले निर्माण गरिएको यो टावर प्रचारप्रसारको अभाव र पहुँच मार्गको कठिनाइका कारण आन्तरिक तथा बाह्य पर्यटक पुग्न नसकेका हुन् ।

विसं २०७३ मा सुरु गरेर २०७८ मा सम्पन्न गरिएको ४५ फिट अग्लो भ्यु टावर अहिले बेवास्तामा परेको छ । टावरबाट देखिने दृश्य आसपासकै जस्तो भएकाले पर्यटकलाई विशेष आकर्षण नलाग्ने गरेको स्थानीय विनोद भण्डारीले बताए । उनका अनुसार, टावरसम्म पुग्ने बाटो झाडीले ढाकिएको छ र सडक पनि सहज छैन, जसले गर्दा धेरैले त्यहाँ जान चाहँदैनन् ।

नगरपालिकाले टावर वरिपरि तारबार लगाएर व्यवस्थापन गरे पनि आकर्षक थप संरचना नहुँदा क्षेत्र सुनसान बनेको छ ।

चापाकोट नगरपालिका प्रमुख देवबहादुर खाँणका अनुसार, भ्यु टावरको पुनर्जीवनका लागि अहिले नगरपालिकाले पहल थालेको छ । “पर्यटक क्लब, आमा समूह र समाजसेवीलाई परिचालन गरेर प्रचारप्रसार तथा सचेतना अभियान सुरु गरिएको छ,” प्रमुख खाँणले भने ।

स्थानीयवासीहरूका अनुसार, संरचना मात्रै होइन, त्यसको दीर्घकालीन व्यवस्थापन र प्रयोगमा ध्यान दिन सके चापाकोटको पर्यटन पुनः चम्किन सक्छ । उनीहरूको भनाइमा, भ्यु टावर अझै पनि आकर्षणको केन्द्र बन्न सक्छ, यदि सही प्रचार, पहुँच र कार्यक्रममार्फत पुनः सक्रिय पारियो भने ।