काठमाडौं । सरकारले लिएको मितव्ययिताको नीतिको धज्जी उडाउँदै बाग्मती प्रदेशका मुख्यमन्त्री इन्द्र बानिया हेलिकोप्टर चढेर वनभोज खान गएका छन् । कांग्रेसका जिल्ला सभापति रामचन्द्र यादवले आयोजना गरेको वनभोजमा उनी हेलिकोप्टरमा पुग्दा स्थानीयलाई रमिता भयो ।

अंग्रेजी नयाँ वर्षका अवसरमा सिरहा जिल्लाको धनगढीमाई नगरपालिका वडा १४ सर्रे अम्बासमा उक्त वनभोज आयोजना गरिएको थियो । अर्कै प्रदेशका मुख्यमन्त्री बानियाँ दिउसो करिब ३ बजे वनभोजस्थलमा पुगेका हुन् । स्थानीय अर्जुन थपलिया आफ्नो फेसबुकमा यसको भिडिओ पोस्ट गरेका छन् ।

थपलियाका अनुसार मधेश प्रदेशका मुख्यमन्त्री कृष्ण प्रसाद यादव पनि पिकनिकमा सहभागी भए । यादव आफ्नो कारगेटसहित गएको थपलियाको भनाइ छ । मुख्यमन्त्री आउने भनिएपछि करिब दुई दर्जन सुरक्षाकर्मी वनभोजस्थलमा खटिएको उनले बताएका छन् ।

मुख्यमन्त्रीको हेलिकोप्टर आउँदा पिकनिकमा सहभागी भएका स्थानीयवासीहरु रमाएका थिए । हेलिकोप्टर हेर्नलाई तँछाडमछाड भएको थियो ।

थपलियाले भने, ‘यहाँका जनताले यति नजिकैबाट हेलिकोप्टर देख्न पाएका थिएनन् । यही नै एउटा उपलब्धि भयो ।’ हेलिकोप्टर कसको खर्चमा ल्याइएको हो भन्ने खुलेको छैन ।